Royal Greenland suliffeqarfittut sulisorisami isertitakinnerusut meeraasa Danmarkimi efterskolernikkut piginnaasatigut siuariaateqarnissaannut tapersersorumallugit suliniummik nutaamik aallartitsivoq.

Kalaallit Nunaanni inuusuttunut ilinniarfiusartuneersut oqaatigaat, inuusuttut Danmarkimi efterskolersimasut inuusuttunut ilinniakkamik ingerlatsigaangata ilinniartoqatiminnit efterskolersimanngitsunit ingerlalluarnerusartut.

Royal Greenlandip suliniummik aallartitsinermini kissaatigaa, sulisorisami isertitakinnerusut meeraasa piginnaasatigut siuariaateqarnissaannut, kulturimik allamik misigisaqarnissaannut aamma Danmarkimi efterskolernerminni puigunaatsumik misigisaqarnissaannut tamatumanilu inuusuttut ilinniarnermi inersimasunngornermilu unammillernartunik aqqusaagaqartarnermik nassataqarfiusartumi inuttut piareersimanerunissaannut periarfississallugit.

”Suliniuteqarnitsinni inuusuttuaqqat sisamat Danmarkimi ukiumi atuarfiusumi 2015-16-imi efterskolernissaannut periarfissaqartitsinissarput ilimagaarput,” Sulisoqarnermi siunnersorti Ulla Skibsted oqarpoq.

Meeqqat ataasiakkaat efterskolernerannut atatillugu angjoqqaatut nammineq akiligassat matussusernissaannut Royal Greenlandip tapiissuteqartarnerata saniatigut meeqqap soorlu kaasarfimmiussaanik aamma efterskolerneranut atatillugu aningaasartuutinut allanut angerlarlunilu juullisioriarluni angalanissaanut aningaasartuutissanut tapiissaaq.

Royal Greenlandip ilaatigut Royal Greenland Academy aamma Internationale Management Traineetut ilinniagaq aqqutigalugit sulisumi piginnaasatigut siuariaateqarnissaannut ataavartumik tapersersuisarpoq, efterskolertitsisarnermullu suliniummik ingerlatsinitta ilutigisaanik Royal Greenlandimi ilinniarluarsimasunik siunissami sulisoqarlernissatsinnut periarfissaqarnissarput naatsorsuutigaarput.

Royal Greenland Kalaallit Nunaanni immikkut ittumik akisussaaffeqarpoq, ammasumillu attaveqatigiinnikkut eqeersimaartumillu suleqataanikkut inuiaqatigiinni pissutsitigut unammillernartunik toraagaqarnermi aaqqiissuteqarniarluta suleqataalluarnissarput kissaatigaarput, annermillu piginnaasanik ineriartortitsineq inuiaqatigiinnut pingaaruteqarluinnartuusoralutigu.

Asseq

 
 

Royal Greenland aperiguk

i
Write the text from the image