Kristian Broberg atiinilu Kristian Broberg angallammik 27 fodsiusumik Trophy-mik 200 HK sakkortussusilimmik motorilimmik angallateqarlutik ippassaq pingasunngorneq ullaakkut Ilulissaniit piniariarlutik aallarsimapput. Ualikkut anorlileriartormat angutit taakku marluk Qullissat avataani kisartuinnarniarlutik aalajangersimapput.

- Kisariitsiarluta kisatta allunaasaa kittorarmat Saqqamut, ikerasak ikaarlugu ikaaginnarniarluta aalajangerpugut. Tassanngaannaq malerujussuit portungaatsiaqisut marluk akornanni millugunneqarpugut tassalu motorerput unilluni. Angallat sukkkasuumik immalertorpoq uangalu angallammik qalusininni aappara VHF-radio atorlugu Aasiaat Radioanut atassuteqarniarsarivoq. Kisiannili VHF-Radio angallammiittoq atorsinnaajunnaarpoq, qujanartumilli VHF radiomik angallattakkamik nassarallartilluni Aasiaat radioa atassuteqarfiginiarsaraa. Taamalineran kilisaat Lomurip Aasiaat radioanut nalunaaruteqarnerput tusaasimavaat, taakkulu Aasiaat radiuatigut sumiinnerput paasereeramikku ornilertorpaatigut.

- Taamaalinerani angallat immaannaavippoq uangalu qalooriinnaavippunga malissioqaagullu. Piffissami tassani malerujussuaq angisooq takkussimasuuppat immap nukinginit millugussaasimassagaluarpugut, Kristian Broberg oqaluttuarpoq.

Kilisaatip Lomurip angutit marluk kivileramik ikioqqullutik Aasiaat radioanut nalunaaruteqarnerat nalunaaqutaq ualikkut sisamat qeqqanut tusaagamikku qalutik amuupallariarlugit annaassiniarlutik angutit sumiiffiata tungaannut ingerlaarput.

Kilisaatip naalagaa Jakup Eli Beck ima oqaluttuarpoq:

- Anorleqimmat annaassiniarneq ajornakusoorpoq aammami qiianaqimmat. Taamaattumik aamma angallat kiveriaannaasoq anguarput. Angutit siulluillugit angallammut qaqitereeratsigit kingorna aamma angallataat qaqipparput. Kisianni tassa piffissaq kingullerpaaq atorlugu angutit annaappavut.

- Kingorna angutit Ilulissiaappagut unnuap qeqqatalu eqqaani angutit nuannaaqisut apuullutigik.

- Nuannaaqaagut angutit marluk inuunerannik annaassigatta. Soqutaanngilaq ulloq unnuarlu aalisarnissaraluarput annaagatsigu, inuimmi inuunerannik annaassineq pingaarneruvoq, Jakup Eli Bech tulluusimaaqisoq oqarpoq.

Kilisaat Lomur 50 procentimik Royal Greenlandimit piginneqataaffigineqartoq qulinik inuttaqarpoq.

Tekst :ineg@royalgreenland.com

Asseq

 
 

Royal Greenland aperiguk

i
Write the text from the image