-       Argentinami AFS-ersinnaaninnut Royal Greenland tapiisinnaammat qujamasuutigeqaara, maannami spanskisut oqaluttalerpunga, imminut tatiginerulerpunga namminersorluarsinnaalerlungalu, taama oqarpoq 17- inik ukiulik Manumina Jensen Poulsen.

Manumina Jensen Poulsen Argentinami AFS-erpoq 2013-imi aggustusimiit  2014 –mi aasaq tikillugu. Argentinamiinninni illoqarfimmi Concordiami 157.500-nik innuttaqartumi najugaqarpoq.

-       Akunnerit 15-it timmisartoreerluta Conkordiami angajoqqaarsiassannut apuuppunga, taakku pingasunik meeraqarput.

-       Aggustusimi Conkordiamut tikinnera immikkuullarippoq taqqavanimi ukiuuvoq nunatsinni aasarisseruttortoq. Unnuaq siulleq qiiavunga naak kissarsuut innaallagiatortoq ikumagaluartoq, Manumina oqaluttuarpoq.

Manumina atuarfimmi nuannareqisamini erniinnaq ikinngutitaajortorpoq.

-       Atuarfimmi ikinngutitaajortoqaanga, taakkulu peqatigalugit nuannersorpassuarnik misigisaqartarpunga.  Atuartilluta uniformeqartarpugut, imaallaat aamma unifomeqarlunga atuartarlunga misilippara. Spanskisut ilinniarninni inuit tamarmik ikuukkumasaqaat, maannalu spanskisut oqaluttarpunga. Sunngiffinni timersortarpunga aamma ikinnguterpassuakka ilagalugit illoqarfiliarluta nuannisariartarpugut.

-       Ukioq misigisaqarfioqaaq, naak juullip nalaani angerlarsilaaraluarlunga.  Decemberimiit marsip tallimaata tungaanut aasaanerani atuanngiffeqarpugut. Taassuma kingorna allanik angajoqqaarsiartaarpunga.

-       Argentinamiinnera ilinniutigeqaara aamma pissanganartorpassuarnik misigisaqarfigaara.

Manumna nunatsinnut uterluni aallalerami ikinngutini angajoqqaarsianilu ungagisimaqai.

-       Takorloorloorsimanngisaannarsimagaluarpara ikinngutikka angajoqqaarsiakkalu qimalerukkit qiassallunga, kisianni inuulluaqqugakkit qiavunga aammami nalugatsigu qaqagu takoqqikkumaarnerluta.

Manumina oqarpoq Argentinamiinnermini namminersorsinnaalersimalluni.

-       Ilaquttat qimallugit inuuneq misigivara, spanskisut ilikkarpunga, imminut tatigineruleqaanga aammalu namminersorluarsinnaalerlunga. AFS-erlunga Argentinamiinnera nuannersunik eqqaamasaqarfigiuassavara. Taamaattumik inuusuttoqatikka periarfissaqartillutik nunarsuarmi angalanissaannik kaammattorusuppakka, Manumina maanna Nuummi GU-mi atuartoq naggasiilluni oqarpoq.

Manumina Jensen Poulsenip Argentinami AFS-erluni atuariartornissaanut Royal Greenland tapeeqataavoq.

Allattoq: ineg@royalgreenland.com

Asseq

 
 

Royal Greenland aperiguk

i
Write the text from the image