Royal Greenlandip Imarsiornermik Ilinniarfik, naalakkersuisoqarfiit, GA allallu imarsiornermik aallussallit suleqatigalugit kilisaatini naalagassanik ilinniartitsinissaq atorfinitsitsisarnerlu siunertaralugit siunnerfiliilluni pilersaarummik siorna saqqummiussivoq. Siunnerfiliinermi pingaarnerpaatut anguniarneqarpoq Kalaallit Nunaanni imarsiornermik ilinniakkat qaffassarnissaat aammalu minnerunngitsumik naalakkat Kalaallit Nunaanni najugaqavissut kilisaatini atorfinitsinneqartalernissaat.

Tassunga atatillugu eqqaaneqarsinnaavoq Royal Greenlandip ilinniartitsiniarluni atorfinitsitsiniaallunilu siunnerfiliilluni pilersaarusiani ilinniarfiusinnaasunik nunatsinni Danmarkimilu nittarsaassinerni ulluni makkunanerpiaq saqqummiummagu. Siunnerfiliineq Royal Greenlandip siunissami avammut nittarsaassisarnerani ilaalluinnalertussaavoq.

Kalaallit Nunaanni aqumiut naalakkallu peqatigiiffigiligassaata ilinniartitaanikkut atorfinitsisarnikkullu anguniagaqartup ilinniartitsinikkut atorfinitsitsiniarlunilu iliuusereriikkanut pitsanngorsaataaginnassaaq, peqatigiiffimmillu suleqateqalernissarput qilanaaraarput.

Royal Greenlandimit iliuuseqarniarluni pilersaarutaavortaaq umiarsuarni atorfinitsitsiniaasarfimmik nuna tamakkerlugu atuuttussamik pilersitsinissamut siunnersuuteqarnissaq. Tassani Imarsiornermik Ilinniarfiup ataaniilluarsinnaasumi umiartortut kikkulluunniit saaffiginnittarsinnaapput, umiarsuarmi atorfininniarnermi aammali allagartatigut nutarsaanissamut qulakkeerinninniarnikkut. Umiarsuarni atorfinitsitsiniaasarfik tassaasinnaavortaaq apeqqutilliilluni sutigullu tamatigut siunnersortinniarluni saaffiginnittarfik.

Atorfinitsitsiniaalluni allaffik ajunnginnerpaanik atugassaqartitsinikkut umiarsuaatileqatigiinnut sulisussanik iliniarluarsimasunik neqerooruteqartarsinnaassaaq.

Aqumiut naalakkallu peqatigiiffigilerumaagaat siunissaq ungasinnerulaartoq eqqarsaatigalugu aamma ikerinnarsiorluni aalisarnermi naalakkanik pilersueqataalluarsinnaavoq. Royal Greenlandip – qularnanngitsumillu umiarsuaatileqatigiit avaleraasartoorniarnermik aallussallit ikigisassaajunnaareersut – aqumiussanik naalagassanillu piginnaasaqarluartunik periarfissaqalernissaa qilanaarilereerpaat.

Asseq

 
 

Royal Greenland aperiguk

i
Write the text from the image