Fiskeriteknologit, angallammi naalakkat maskiinalerisullu Royal Greenlandimi amigaataajartornerat ukiuni kingullerni malunnarsisimavoq. Tamanna kinguneqarpoq Royal Greenlandi ilinniartunut qaninnerusumik sukumiinerusumillu atorfiit pillugit paasititsiniaasalerneranik. Neriuutigineqarpoq atorfiit inuttalerneqartussat ilinniartunut kajuminnarninngortinneqarsinnaanissaat.

- Sulisunik amigaateqarneq eqqarsaatigalugu sulisussanik ilinniarsimasunik amigaateqarnerput eqqartornerusarparput, pingaarnertut fiskeriteknologit. Fiskeriteknologit tassaapput tunisassiornermi aqutsisuusartut, soorlu kilisaatini aamma tunisassiorfinni. Massakkut tunisassiorfinni sulisut aqutsisutut ilinniarsimanngitsut amerlapput, tamannalu siunissami ajornartorsiutaalersinnaavoq, Adolf Egede sulisoqarnermi siunnersortaasoq oqarpoq.

Royal Greenlandimi sulisoqarnermi isumaginnittut kilisaatinilu inuttalerinermut isumaginnittut oqaatigaat fiskeriteknologit tunisassiorfinni kilisaatinilu amigaatigineqartut 50-it missaanniittut.

Aappaattut angallammi naalakkat amigaataapput. Inatsisartut malittarisassaanni nr.13-imi 2011 novembarip 17-ianeersumi allaqqavoq, kilisaammi inuttaasut ilinniarsimasut 60 procentii nunaqavissusariaqartut, maskiinalerisut inatsimmi pineqanngillat. Kilisaammi sulisuinnaat 100 procentii nunaqavissuunissaat piumasaqaataavoq.

- Nunaqavissut kilisaatiniittut ilaatigut ikippallaarput, soorlu maskiinalerisunik nunatsinni peqanngingajavippoq. Amigaateqarneq peqqutigalugu inatsisinik unioqqutitsisoqarnissaa ilaatigut qanittarpoq, tassa tikisitanik ilinniarsimasunik sulisoqarnissaq ilaatigut pisariaqalersarmat , Adolf Egede oqarpoq. Nangipporlu:

- Ilinniarfinni nittarsaassinerit kisiisa aqqutiginagit suliffeqarfimmi atorfiit siunissaqarluarnerat ilinniartoqarfinnut siammarterniarparput. GU-mi imaluunniit meeqqat atuarfiini sammineqatunut attuumassuteqartunik uagut saqqummiussisarusuppugut, ilinniarfinni nittarsaassinerni taamaallaat saqqummerata, kisianni aamma ulluinnarni suliarisartakkavut pillugit saqqummiisarluta. Tamakku anguneqarpata pissanganarpoq qanoq inerneqarumaarnersoq.

Allattoq: erre@royalgreenland.com

Asseq

 
 

Royal Greenland aperiguk

i
Write the text from the image