Royal Greenland Academy aqqutigalugu sinerissami tunisasiorfinni sulisunut pikkorissartitsinissat assigiinngitsut pingasuusunit marluk ingerlanneqangajalerput, Qasigiannguanilu akunnermuliuttutut aqutsisut aqqaneq-marluk Saqqamilu tunisassiorfimmi sulisut qulingiluat tunisassiorfimmi suliarisartakkatik tungaatigut pikkorissarnissaminnut taamaasillutik periarfissaqalerput.

- Qasigiannuani akunnermuliuttutut aqutsisut ”Aqutsinermut sakkussat” pillugit novembarip 22-aniit 25-ata tungaanut pikkorissartissavakka, Saqqamilu tunisassiorfimmi sulisut ulluinnarni ileqquminnik allannguisinnaanngornissaannut novembarip 18-ianiit 20-ata tungaanut pikorissartissavakka, tamatumanilu pikkorissartitsineq ”Ileqqunik allannguineq”-mik qulequtaqassaaq, Sulisoqarnermi siunnersorti Esther Arens oqarpoq.

- Qasigiannguani pikkorissartitsinerup siunertaraa, tunisassiorfimmi sulisut akunnermuliuttuttullu aqutsisut pitsaanerusumik suleqatigiilersinnaaqqullugit oqaloqatigiilluarsinnaanngornissaat anguneqassasoq. Pingaarnertut pissusissamisoortumik siunertaavoq, tunisassiorfimmi sulisut tunisassiorfimmi ulluinnarni suligaangata atugaasa oqinnerulernerannik kinguneqartitsisussamik akunnermuliuttutut sulisut ulluinnarni sulinerminni pikkorinnerulissasut. Akunnermuliuttutut aqutsisoq sulinermini eqqortunik sakkussaqaraangat akorngutit ajornartorsiutillu allat ilisimaarineqartut ajornannginnerusumik aaqqinneqarsinnaasarput, Esther Arens oqarpoq.

Qasigiannguani akunnermuliuttutut aqutsisut pikkorissartinneqarnerat ukiortaami malitseqarumaarpoq.

Ileqqut allanngortinneqassapput

Aammattaaq nunaqarfimmi Saqqami tunisassiorfimmi sulisut pikkorissartinneqarnissaminnut peeriarfissaqassapput.

- Saqqami tunisassiorfimmi sulisut qulingiluat suliffiup avataatigut inuunerat ileqquilu tunisassiorfimmi ulluinnarni sulinerannut qanoq sunniuteqartarnersoq novembarip 18-ianiit 20-ata tungaanut pikkorissarnerminni sammissavaat. Suliffimmilu sulinerminni atukkatik pitsanngorsarnissaannut ileqqunik allannguineq ilinniartussanngussavaat, Esther Arens oqarpoq.

- Tunisassiorfimmi ulluinnarni atukkat pitsaanerulernissaat sulinerlu pitsaanerusumik sunniuteqarnissaa anguniaraanni pingaaruteqarpoq tunisassiorfimmi sulisut ilisimassagaat ulluinnarni ileqqut suliffigisamut sunniuteqartartut, Sulisoqarnermi siunnersorti oqarpoq.

Qasigiannguani Saqqamilu piffissami qanittukkut pikkorissartitsinissat marluupput arlaliusunit, pikkorissartitsinerillu Royal Greenland Academymit ukiaq manna aallartinneqarput. Royal Greelandip illoqarfinni nunaqarfinnilu tunisassiorfiini sulisut 2015-imi maajip tungaanut pikkorissartitsinernut assigiinngitsunut pingasunut peqataanissaminnut periarfissaqarput.

Allattoq:ineg@royalgreenland.com

Asseq

 
 

Royal Greenland aperiguk

i
Write the text from the image