Aappilattumi Royal Greenlandip tunisassiorfia tallimanngormat ammarneqarnera nunaqarfeeqqami nuannaarutigineqaleruttortoq ullut marlussuinnaat saarullinnik tunisisinnaaneq periarfissaareersoq ippassaq 19. november nuna tamakkerlugu sinerissap qanittuani saarullittassat nungummata tunisineq unitsinneqarpoq.

- Saarulleqaqaaq, taammattumik aamma maanna saarullinnik tunisisinnaajunnaarnerput uggornaraluaqaaq, taama oqarpoq Aappilattumi piniartut aalisartullu peqatigiiffiani KNAPP-mi siulittaasoq Hans Levisen.

Tunisassiorfimmi saarulliit, qeeqqat, suluppaakkat aammalu qalerallit tunineqarsinnaapput. Ataasinngorneq marlunngornerlu qalerallit 400 kilo-ngajaat tunisassiorfimmut tunineqarput.

- Qujanartumimmi suli qaleralinnik, qeeqqanik, aammalu suluppaakkanik tunisisinnaavugut, kisiannili saarulleqangaarmat qaleralinniutit 440 miiterinik takissusillit ningikkaangtsigit saarulliit ilanngullugit pisarinngitsoorsinnaanngilagut.

- Ajoraluartumik aamma umiatsiaararsortut arlaqaqisut qaleralinniutinik suli peqannginngillat. Maanna qalerlinniarnermi atortut tikinnissaat utaqqivagut, neriuutigaarpullu decemberip aallartilaarnerani tikinnissaat.

Saarullinnik tunisisinnaaneq unitsinneqaraluartoq Hans Levisen isumalluarpoq.

- Ukiut qulit kingulliit puisit amiinik tunisisinnaaneq kisiat periarfissarinikuugatsigu, taammaattumik maannakkut isumalluaqaagut. Nunaqarfimmiut tamarmik aalisarnermi akuupput. Inuusuttut suliffissaaleqisut aalisartut neqitsersuinerini aalisarnermilu ikiuupput allallu aalisakkerivimmi sulillutik, taamaattumik siornatigorniit sammisassaqarneroqaagut, Hans Levisen oqarpoq.

Aapilattuni tunisassiorfimmi maannakorpiaq inuit pingasut sulisorineqarput. Aalisarneq aallartilluariarpat sulisut tallimat arfinililluunniit sulisorineqalertussaapput kingusunnerusukkulli inuit qulit angullugit sulisorineqarnissaat siunniunneqarpoq.

Tunisassiorfimmi ullormut tonsit arfinillit qeritinneqarsinnaapput tassanilu 70-80 tons angullugit qeritinneqarsinnaallutik.

Tekst: Inga Egede

Foto: Themo Benjaminsen

Asseq

 
 

Royal Greenland aperiguk

i
Write the text from the image