Nerrivik kusanasaagaq tunisassianik imarmiunik suliarilluakkanik ulikkaartoq alutorsaataangaatsiarpoq qullersaqarfiup Nuummiittup ilaneqarnera ippassaq ataasinngornermi oktobarip 20-ani atoqqaarfissiorneqarmat. Tamussiussassat mamarunarluinnartut assingi quppernermi uani takuneqarsinnaapput.

Royal Greenlandip Nuummi qullersaqarfiata allineqareernerata kingorna sulisut qaammatini marlussunni inissaqarnerulaarlutik sulisimapput. Inillu pisortatigoortumik ippassaq katerisimaarnermi atoqqaarfissiorneqarput.

Qullersaqarfiup ilassutaani isaariaq nutaaq, saaffiginnittarfik, nerisarfik, igaffik, ataatsimiittarfiit aammalu majuartaat inissisimapput, majuartaat minillugu tamarmik inini nutaani 319 kvadratmeterinik initutigisuni inissisimallutik.

Pisortaanerup Mikael Thinghuusip aamma siulersuisuni siulittaasup Niels Harald de Coninck-Smithip ukiut arlalialuit matuma siorna qullersaqarfimmut iseqqaarnertik eqqaamasaqarfigaat.

Illup silataani eqqagassarpassuit aammalu iserluni majuartarfeqarfimmi ammoniakkisunnersuaq aalisagarsunnilu assut tupigusuutigisimavaat, marluullutillu eqqarsarsimapput avatangiisit taamaattut suliffeqarfimmut nunarsuarmi siaruaassimasumut naleqqutinngitsut. Taamaammallu qullersaqarfiup ilaneqarnerata inerneranik ippassaq nittarsaanneqarsinnaasumik naammagisimaarinnilluinnarput.

Pisortatigoortumik atoqqaarfissiortitsineq ualikkut ingerlanneqarpoq, suleqatigineqartartullu inini nutaani takornariartinneqarput. Tamatuma kingorna oqaloqatigeerujoornerit ingerlanneqarput.

Qulersaqarfiup ilaneqarnerani suliffeqarfiit Clement & Carlsen Arkitekter, InuPlan A/S, Permagreen A/S, Carl Lynge A/S, Grønlands VVS aamma Arctic Import A/S suleqatigalugit naammassineqarpoq.

Init ilassutaasumiittut aalisartut piniartullu qalulerivittut sullivittullu siornatigut atugarisimavaat.

Allattoq: Káte Hansen, kaha@royalgreenland.com

Assit: John David Eriksen

Asseq

 
 

Royal Greenland aperiguk

i
Write the text from the image