Pikkorissaanerit pingasut nutaat illoqarfinni nunaqarfinnilu tunisassiorfinni sulisut amerlanersaannit aammalu aqutsisut 60-it missaannit peqataaffigineqartussat qulequtaqarput "Ileqqut allanngortikkit", "Aqutsisunut sakkussat" kiisalu "Piukkussanik ineriartortitsineq 2015-2016".

Pikkorissaaneq "Ileqqut allanngortikkit" tunisassiorfinni sulisunut sammisuuvoq. Pikkorissarnermi suliffimmi angerlarsimaffimmilu pissutsit ukkatarineqassaapput.

- Angerlarsimaffimmi suliffimmilu pissutsit assigiinngilluinnarnerat sulisut iluaqutissarsiffigalugu suli eqqummaariffiginerulersinnaavaat. Pikkorissaanitsinni pingaarutilittut ukkatarerusuppagut suliffimmi, angerlarsimaffimmi sulinngiffimmilu assigiinngitsunik periuseqartarnerput pissusilersuuteqartarnerpullu, Sulisoqarnermi siunnersorti Esther Arens oqarpoq.

Pikkorissartut ajornartorsiutit aalajangersimasut eqqummaariffiginerulissavaat taamaasillutik ileqqunik allannguinermikkut suliffimmi maleruagannik suli pitsaanerusumik malinninnerulersinnaassapput suleqatimillu akornanni suli maligassuilluarnerusinnaalerlutik. Pikkorissaanermi suliffeqarfimmi nakkarsaanerit, pissutsinik allannguisinnaaneq, anguniagassanik pilersaarusiorsinnaaneq, aaqqiagiinngissuteqarnermi periutsit allallu sammineqassapput.

Pikkorissarneq "Aqutsisunut sakkussat" immikkoortunut marlunnut avitaavoq. Pikkorissaqataasut ulluinnarni akimmiffiusinnaasunut suli piareersimaneroqqullugit piukkunnarsarneqassapput. Esther Arensillu ilimagaa pikkorissaanerit taakku peqataasunut, suleqataannut aammalumi suleqatigisartagaannut pissarsiaqaataangaatsiassasut.

- Pikkorissartut ilaatigut aqutsinermi atuagarsorluni ilisimasassanik sakkussanillu ilinniartinneqassapput, taamaasillutik namminneq aqutsisutut nukittuffitik sanngiiffitillu takusinnaalerniassammatigit. Peqataasut tamatuma kingorna siunnersortertik – qullersarisinnaavaat imaluunniit pikkorissaasoq – peqatigalugu pikkorissarsimanerminni ilinniakkatik aallaavigalugit misilittaasassapput, naggaterpiaatigullu nalunaarusiornermik inaarutaasumik tunniussissallutik, Esther Arens nassuiaavoq.

Kiisalu pikkorissaanermi nutaami pissanngatigineqartumilu "Piukkussanik ineriartortitsineq 2015-2016"-mi pikkorissaqatigiit assigiinngitsunik tunuliaqutallit aallartissapput. Pikkorissaaneq taanna teknikkikkut imaluunniit atuagarsornermik tunuliaqutalinnut naleqqussagaavoq. Royal Greenland aqutsisunik pikkorissunik najugaqarfinni amigaateqakkajuppoq, pikkorissaanissamilu siunertarineqarpoq suleqatinik piukkussanik qaffassaanissaq, taamaasillutik atorfinni qaffasinnerusuni atorfeqalersinnaanerannut piukkussarneqassapput.

Pikkorissarneq immikkoortunut sisamanut agguataagaavoq, atuarnermik suliffimmillu misiliinermik ilaqarluni aammalu aqutsisunngorniat ilinniarfiannik INUILI-millu suleqateqarluni ingerlanneqartussamik. Pikkorissarnermi siunnersorteqarneq ilaavoq, tamatumanilu anguniagaavoq peqataasut ilinniagaqarnerminni sapinngisamik ilikkagaluarnissaasa qulakkeerneqarnissaa.

Allattoq: Káte Hansen, kaha@royalgreenland.com

Asseq: John David Eriksen

Asseq

 
 

Royal Greenland aperiguk

i
Write the text from the image