- Sulisussaaleqineq pissutigalugu maannakorpiaq tunisasiarisinnaasatta affaannai tunisassiaraavut. Taamaattumik saarulliit nerpii tamakkiisumik tunisassiarisinnaannginnatsigit tunisassiassaagaluit annertuut blokkinut poortorlugit qerititerneqarput. Tamannalu annikinnerujussuarmik isertitsissutaavoq, taama oqarpoq Maniitsumi Royal Greenlandip tunisassiorfiata ingerlatsisua Lisbeth Østergaard.

Maannakkorpiaq inuit 85-it missingi tunisassiorfimmi sulisorineqarput. Taakkulu ulluunerinnaani sulisarput. Tunisassiorfiup ingerlatsisua oqarpoq sulisut amerlanerusut pissarsiarineqarsinnaasuuppata ullukkut unnukkullu sulineq ingerlanneqarsinnaagaluartoq, taamaassillunilu tunisassiorfimmi tunisassiorsinnaaneq tamakkiisoq ingerlanneqarsinnaagaluartoq.

- Inuit 30-t 40-t sulilertissinnaasuugutsigit, taava sulineq ullukkut unnukkullu ingerlanneqarsinnaassagaluarpoq taamaasillutalu ullormut 50 tonsit angullugit tunisassiarisinnaassagaluarpavut. Kisiannili sulisut sulinngitsoortarnerat pissutigalugu ullut tamaasa sulisut 10 procentii amigaatigisaratsigit ullukkut unnukkullu tunisassiorsinnaaneq ajornakusoorpoq, Lisbeth Østergaard oqarpoq.

Aningaasarsiffiup nalaani sulisunik amigaateqartarput

Sulisut sulinngitsoortut taartissaannik sulisunik pissarsiornissaq anguniarlugu immikkut suliaqartussamik sulisumik atorfinititsisimapput. Taassuma sulisunik pissarsiornerinnavik suliaraa. Kisiannili ajornartorsiut qaangerneqanngilaq.

-Sulisut suliartunngitsoortarnerat ataatsimut isigalugu ajornartorsiut annertuvoq, ingammik aningaasarsiffiup nalaani taassumalu kingorna ataasinngornikkut. Taamaattoqartillugu sulisut sisamararterutaat amigaatigisarpavut, tunisassiorfiup ingerlatsisua oqarpoq.

- Taamaattumik sulisussarsiortartussamik atorfinitsitisivugut. Taassuma sulisut suliartunngitsoortillugit sianeqattaarluni sulisussarsiornerinnavik suliaraa. Tassa ajornartorsiut iliuuseqarfigigaluarparput aamma suliffisarsiuussisarfik suleqatigilluagarput suleqatigalugu. Kisiannili sulisunut takkutinngitsoortunut nukiit sulisussarsiornermut atorneqartut atulussinnarneqartarput, Lisbeth Østergaard oqarpoq.

Qeeqqata Kommuniata suliffissarsiuussisarfiata nalunaarutigaa Maniitsumi juulip naanerani inuit 167-it sulisussarsiortutut nalunaarsoqqasut. Qaqqata Kommuniani illoqarfinni nunaqarfinnilu tamani juulip naanerani inuit 599-it suliffisarsiortut nalunaarsoqqapput.

Allattoq: Inga Egede

Assit: RG

Asseq

 
 

Royal Greenland aperiguk

i
Write the text from the image