- Tunisassiorfimmi sulisut 50-it sulisoraagut, taakku paarlakaallutik suleqatigiiaani marlunni 25-nut avillutik suleqatigiittarput. Ullut tamarluinnaasa sulisut tallimat qulillu missaanniittut napparsimallutik nalunaaqqaaratilluunniit suliartunngitsoortarput. Suliartunngitsoortut amerlavallaaraangata saarulliit nerpii tunisassiagut ilaanni ullormut tonsit sisamat tallimalluunniit tunisassiarisarpavut, Paamiuni Royal Greenlandip tunisassiorfiani ingerlatsisoq Ilannguaq Abrahamsen oqarpoq.

Paamiuni aalisakkanik tunisassiorfik saarulliit nerpiinik ukioq manna juunimi tunisassiulerpoq. Tunisassiorfimmi ingerlatsisup oqaatigaa ullormut nerpiit tunisassiat tonsit qulit anguniartarlugit, maannamulli nalinginnaasumik ullormut tonsit arfineq-marluk arfineq-pingasulluunniit tunisassiarineqartarput.

- Sulisunik amigaateqartuaannartilluta tunisassiornerup ataavartumik ingerlanniarnera unammillernartoqarpoq. Tunisassiat annikillisarput aamma sulisunut aalajaatsunut ullut tamaasa takkuttunut sunniuteqartarpoq, suliartunngitsoortoqartillugumi sulisut aalajaatsut sulerulunnerusariaqartarmata, Ilannguaq Abrahamsen oqarpoq.

- Pikkorissunik aalajaatsunillu sulisorpassuaqarpugut. Sulisussanilli amigaateqartuartilluta sulisut nutaat takkuttut tunisassiorfitsinni suleriuutsinik ilinniartsittuartarnissaat unammillernartoqarpoq. Taamattumik tunisassiorneq ataavartoq ingerlanniarlugu sulisut aalajaatsut sulinerusariaqartarput, Ilannguaq Abrahamsen oqarpoq.

Kommune suleqatigineqarpoq

Sulisusut takkutinngitsoortartut ullormiit ullormut nikerarput. Sulisullu amerlasuut suliartunngitsoortillugit tunisassiorfiup Kommuneqarfik Sermersuumi suliffissarsiuussisarfik attavigisarpaa sulisussanik nutaanik pissarsiniarlutik. Suliartoqquneqartulli tamarmik takkunneq ajorput.

- Ilaannikkut sulisussat qulit 15-illu amigaatigisarpavut, taakkuli kommune aqqutigalugu ujartortarlutigik. Amerlanertigulli inuit marluinnaat takkuttarput. Taamaattoqartillugu tunisassiorfimmi ataavartumik tunisassiorniarneq ilungersunarsinnaasarpoq, Ilannguaq Abrahamsen oqarpoq.

Tunisassiorfimmi sulisut sapaatip akunneranut ataasiarlutik ataatsimiisinneqartarput. Ataatsimiinnermi sulisut sapaatip akunnerata ingerlasimanera pillugu pasissutissinneqartarput.

- Sulinngitsoortarnerup pinngitsortinneqartarnissaa qanoq pingaaruteqartiginersoq ataatsimiinnerni sulisut paasitsinniartarpavut. Soorunami sulisut suliartussanerlutik suliartussannginnerlutilluunniit namminneq aalajangigassaralugulu akisussaaffigaat, Ilannguaq Abrahamsen naggasiivoq.

Aggustip 18-ni 2015 Paamiuni suliffissarsiorlutik nalunaarsorsimasut 85-iusut Kommuneqarfik Sermersuumi suliffissarsiuussisarfik ilisimatitsivoq.

Allattoq: Nathan Kreutzmann, nakr@royalgreenland.com

Assit: Nathan Kreutzmann aamma Tobias Tobiassen

Asseq

 
 

Royal Greenland aperiguk

i
Write the text from the image