Royal Greenlandip Qasigiannguani innuttaasut oqaloqatigerusuppai. Taamaattumik Royal Greenlandimi Sulisoqarnermi immikkoortortap Qasigiannguani aalisakkanik tunisassiorfik, SIK kiisalu Qaasuitsup Kommuniani isumaginninnermut suliffissaqartitsinermullu ingerlatsivik suleqatigalugit Qasigiannguani innuttaasunik ataatsimiisitsisoqarnissaanut aaqqissuivoq. Innuttaasunik ataatsimiisitsineq suliniutinik immikkut ittunik pilersitsinermik kinguneqassaaq.

- Innuttaasut oqaloqatigerusukkatsigit taamatuttaaq Qasigiannguani tunisassiorfiup illoqarfimmut qanoq pingaaruteqartiginersoq innuttaasullumi tunisassiorfimmut qanoq pingaaruteqartiginersut innuttaasut peqatigalugit eqqartorusukkatsigit Qasigiannguani innuttaasunik ataatsimiisitsiniarpugut. Tunisassiorfik tunitsivittut tunisassiorfittullu ingerlaannassappat suliartortitsiniartarnerup ajornakusoornerata sulisussaaleqisarnerullu tungaatigut ajornartorsiutit aaqqinneqassapput, tamatumani suliartortinneqartartut amerlanerusariaqarmata aalajaatsunillu sulisoqarnissaq pisariaqarmat, Svend Larsen Royal Greenlandimi sulisoqarnermi siunnersorti oqarpoq.

Sulisoqarnermi immikkoortortami sulisut ilimagaat Qasigiannguani 2015-imi aggustip 26-ani innuttaasunik ataatsimiisitsisoqareernerata kingorna ajornartorsiutip aaqqinnissaanut kinguneqartussanik siunnersuuteqartoqassasoq.

- Innuttaasut tunisassiorfiup ulluinnarni qanoq ingerlanneqartarnera sunillu ajornartorsiuteqartarnera pillugit paasisaqarnerunissaat ilisimasaqarnerulernissaallu kissaatigaarput. Taamatuttaaq nersualaarutinik isorisanillu apuussivigineqarsinnaavugut, tamatumanilu suliniutissat suut aallartinneqassanersut ataatsimiisitsereernerup kingorna eqqartussavarput, Svend Larsen oqarpoq.

Sulisoqarnermi immikkoortortaq ussassaarerusuppoq

Sulisoqarnermi siunnersorti aamma oqarpoq, Royal Greenland Academy aqqutigalugu pikkorissartitsisarnikkut sulisut ilinniaqqinnissaannut pikkorissarnissaannullu periarfissaqartitsisarnertik ussassaarutigerusukkitsik.

- Royal Greenlandip tunisassiorfiani sulineq qanoq pilerinartiginersoq takutikkusupparput. Taamaattumik aamma oqaluttuarerusupparput sulilluaraanni aalajaallunilu sulisaraani akissarsiagissaarnissamut sulisunillu pikkorissartitsisarnivut aqqutigalugit qaffasinnerusumik atorfininnissamut periarfissaqarluartoq.

Qasigiannguani tunisassiorfimmi ingerlatsisut inassutaat malillugu innuttaasunik ataatsimiisitsinissaq sivisuumik pilersaarusiorneqarpoq. Aatsaat taamatut innuttaasunik ataatsimiisitsisoqalerpoq, kingornatigullu illoqarfinni allani taamatulli innuttaasunik ataatsimiisitsoqassanersoq aalajangerneqassaaq.

Royal Greenlandip Qasigiannguani innuttaasut tunisassiorfimmilu sulisut sulisullu ilaqutaat innuttaasunik aggusstip 26-ani ataatsimiisitsinissaq sioqqullugu ingerlanneqartussamut timersortarfimmi assigiinngitsunik aliikkusersuinertalimmik nal. 14.00-imiit ataatsimuualaarnissamut qaaqquai. Kingusinnerusukkut 18.00-imiit timersortarfimmi kalaaliminernik sutoqatigiittoqareernerani innuttaasunik ataatsimiisitsisoqassaaq. Innuttaasunik ataatsimiisitsineq quiasaarisartoq Piitannguaq Alaufesen aliikkusersuitillugu aallartinneqassaaq.

Allattoq: Inga Egede, ineg@royalgreenland.com

Asseq: Nathan Kreutzmann

Asseq

 
 

Royal Greenland aperiguk

i
Write the text from the image