Qasigannguani tunisassiorfimmi pisut pillugit pingasunngormat ataatsimiissutigineqaqattaarput. Tunisassiorfimmi ullukkut aammalu unnuarsiorlutik sulisartut, aqutsisut tunisassiorfimmilu ingerlatsisoq immikkoortillugit ullup qeqqata siorna ualikkullu ataatsimiisinneqarput.

- Sulisut immikkut ataatsimeeqatigineqarneranni siunertaraarput sulisut namminneq oqariartuutigiumasaat tusarusukkatsigit. Paaserusupparput sulisut suliffimminni nuanniilliornersut aammalu arlaannik saqqummiussaqarusunnersut. Ataatsimut isigalugu sulisut suliffitsik nuannaraat aammali ataasiakkaanik aaqqinniagassaqarpugut, sulisoqarnermi siunnersorti Claus Nielsen oqarpoq.

Qasigiannguani tunisassiorfeqarneq pillugu piffissami kingullermi nutaarsiassaqarneq ajoraluartumik tusatsiakkanik kinguneqarsimavoq, tamannalu sulisut akornanni avissaartuunnerannik kinguneqarsimavoq. Taamaammat tunisassiorfimmi ingerlatsisoq Frank Hagen pissutsit piviusut aallaavigalugit saqqummiisinneqarpoq.

Sulisoqarnermut immikkoortortaqarfimmeersut ataatsimiinnerit inernerinik iluarisimaarinnipput.

- Misigisimavugut tunisassiorfimmi sulisut aqutsisullu akornanni paatsooqatigiinnerit ataatsimeereernerit kingorna eqqartuinikkut aaqqiivigineqartut, susassaqartullu tamarmik imminnut paasisaqarfiginerupput, sulisoqarnermi siunnersorti Claus Nielsen naliliivoq.

Niels Ole Møller Qasigiannguani tunisssiorfimmi qullersatut oqartussaasoq naliliivoq, tunisassiorfimmi ingerlatsisumik nutaamik atorfinitsitsinerup kingorna pitsanngoriartoqarsimasoq.

- Frank Hagenip atorfinitsinneqarnerata kingorna ingerlatsinerup tungaatigut arlalinnik pitsanngoriaateqarpoq. Tonsimut ataatsimut tunisassiornermi akunnermut sulinerit aaqqipput, tunisassiornermi ingerlaatsit tulluarsarneqarput, tunisassiassat pitsanngoriarput, sulisullu tulluartut akisussaaffeqarfinni eqqortuni sulilerput, Niels Ole Møller oqarpoq.

Innuttaasunik unnukkut ataatsimiisitsineq ornigarneqarluarpoq inuit 200-t missaanniittut peqataallutik. Tunisassiorfimmi ingerlatsisoq Frank Hagen suliffeqarfissuup siunissami anguniagai pillugit saqqummiivoq aammalu sulisut akornanni sulinngitsoortarnerit eqqartuiffigalugit.

SIP aammalu Qaasuitsup Kommuniani isumaginninnermut ingerlatsivimmeersut ataatsimiinnermut qaaqqusatut peqataapput, kingornalu eqqartueqatigeereenermi ataatsimiisitaliaq SIP-mit, Qaasuitsup Kommunianit aammalu Royal Greenlandimit peqataaffigineqartussaq pilersinneqarpoq. Ataatsimiititaliami sulisut akornanni sulinngitsoortarnerit annikillisinneqarnissaat siunertaralugu sulinngitsoortarnernik ajornartorsiuteqarneq eqqartorneqassaaq. Peqataatinneqartullu isumaqatigiissutigaat ajornartorsiutinik pinngitsuuiniarluni qaninnerusumik suleqatigiittoqalissasoq.

- Eqqaamassavarput sulisut 85 procentii aalajaatsuullutillu pikkorissuummata. Taakku nersuarlaarlugillu qutsavissaraagut. Sulisulli sinneri ajoraluartumik ajornartorsiuteqarfigaagut, aalajaatsuunngimmata suliffimminnillu paarsilluarsinnaanngimmata. Sulinngitsoortarnerpassuit aalajaatsuunngitsullu akiorniarneqarsimapput, sulisunut ataasiakkaanut kinguneqartumik.

Siornatigut sulisussanik Kangaatsiap eqqaaneersunik tikisitsisoqartarsimavoq, maannali taakkunani tunisassiorfeqarfiit ammareernerisa kingorna sulisorisarsimasagut taakkunani sulilerput, aqutsivimmi ingerlatsisuusoq Niels Ole Møller oqarpoq.

Innuttaasunik ataatsimiisitsinermi aamma tunisassiorfimmi sulisoq ataaseq siunnersuuteqarpoq tunisassiorfimmi aqutsisut pillugit isumasiuilluni immersuinermik ingerlatsiviussasoq.

- Siunnersuut sulisunit aqutsisunillu taperserneqarpoq. Tamanna tunngavigalugu sulisoqarnermut immikkoortortaqarfik sulisut atugaannik misissuinissamik isumaginnittussanngorpoq, Claus Nielsen oqarpoq.

Allattoq: Káte Hansen, kaha@royalgreenland.com

Assit: RG

Asseq

 
 

Royal Greenland aperiguk

i
Write the text from the image