- Naak tunisassiorfik suleqatigiiaanut marlunnut avitanik 120-nik sulisoqaraluartoq sulisut 60-it amigaatigineqarput. Tamatuma saniatigut sulisut 30 procentii ullut ilaanni sulinngitsoortarput. Taamaattumik tunisassiarisartakkatta annertussusaat massakkut 60-65 procentiupput. Pissutsit eqqaaneqartut atuutsillugit tunisassiornissamut pilersaarutit malinneqarsinnaaneq ajorput, tamannalu tunisassiakippallaarnermik tamatumanilu isertitakippallaarnermik kinguneqartarpoq. Pissutsit eqqaaneqartut ajorluinnarput, tamatumani tunisassiorfik ataavartumik isertitaqarsinnaanngimmat, Royal Greenlandip Qasigiannguani tunisassiorfiani tunisassiorfimmi ingerlatsisoq Frank Hagen oqarpoq.

Frank Hagen oqarpoq, tunisassiorfik qalerallit nerpiinik tunisassianillu immikkut ittunik massakkut tunisassiorsinnaanngitsoq, taamaattumillu qaleralinnik ilivitsunik kisiat qerititsisinnaasoq.

- Sulisussaaleqinerput pissutigalugu qalerallit nerpiinik immikkullu tunisassianik tunisassiorsinnaannginnatta qalerallit tunisassiassat affaat ilivitsuutillugit qerisinnaartariaqartarpavut. Qaleralinnik ilivitsunik taama annertutigisunik qerititsigaangatta aningaasarpassuit annaasarpavut, tamatumani immikkut tunisassiat pávenik taaneqartartut Frankrigimilu suliffeqarfimmut tunisassiarisartakkavut isertitaqarfigilluarsinnaagaluaratsigit.

Igitsineq

Frank Hagen oqarpoq, aalisartut tunisaqareeraangata tunisassiornissamut pilersaarusiorniarneq ajornakusoortartoq.

- Sulisut suliartunngitsoortarnerat napparsimallutilluunniit suliartunngitsoortarnerat pissutigalugu tunisassiornissamut pilersaarutit ajoraluartumik malinneqarneq ajorput. Taamaattumik assersuutigalugu qaleralinnik ullormut 16 tonsinik tunisassiornissatsinnut pilersaaruteqaraluarluta ullormut 10-11 tonsiinnaat tunisassiarisarpavut, tunisassiorfimmi ingerlatsisoq oqarpoq, nangipporlu:

- Ajornerpaarli tassaavoq, qalerallit annertuut igiinnartariaqarsimagatsigit. Ullut 14-it matuma kingorna qalerallit 1800 kiilut ajortunngorsimammata igiinnartariaqarsimavagut. Qalerallit katillugit 2,5 tonsit ajortunngorsimasut qaammatit marluk kingulliit ingerlaneranni ajoraluartumik igiinnartariaqarsimavagut.

Suleqatiserinninneq

Tunisassiorfimmi ingerlatsisoq oqaluttuarpoq, tunissassiorfimmi sulisussanik sulisussarsiornissaq anguniarlugu SIP Qasiagiannguit kiisalu Qaasuitsup Kommuniani suliffissarsiuussisarfik suleqatiserisimagini.

- SIP Qasigiannguit sianerfigalugu allaffigalugulu suleqatiseraara. Tunisassiorfimmut suliartortitsinissani neriorsuutigaa, suliartortoqaranili. Suliffissarsiuussisarfik tunisassiorfimmut suliartortitsiniarsimavoq. Suliartortoqartarpoq, suliartortut ilaat suliartoqqinneq ajorput suliartortitaagaluillu ilaat suliartunngiivinneq ajorlutik. Inuit ikiorsiissutinik kommunimit pisartut suliffissamik qajassuuttariaqartunut naleqqussakkamik neqeroorfigitipput. Qassissunnguit suliartorput, amerlasuulli suliartunngiivillutik.

Qasigiannguani tunisassiorfik Namminersorlutik Oqartussani nuttartarnermut aningaasaateqarfik aqqutigalugu sulisussarsioraluarpoq, kisianni inuit marluinnaat sulilerput. Inuit allat sisamat Sisimiuneersut nammineq akilikkaminnik akisussaaffigisaminnillu Qasigiannguani tunisassiorfimmi sulipput.

Qasigiannguani inuit 65-it suliffissarsiortutut 2015-imi aggustimi nalunaarsorsimapput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image