- Sulisuvut 15-it umiarsuarni tunitsivinni sulilermata sulisussatsinnik Kullorsuarmiit tikisitsisariaqarsimavugut, kisianni Kullorsuarmiit suliartortut ilaasa sulinertik ilungersunarisimavaat, allalli atuariartortussanngornertik pissutigalugu suliunnaartariaqalersimapput, Royal Greenlandip Uummannami tunisassiorfiani ingerlatsisoq, Kirsten Jensen oqarpoq.

Umiarsuarni tunitsivinni aasaq manna sulisut 15-it tassaapput Uummannami tunisassiorfimmi sulisuusimasut sungiussisimalluartut. Sulisussat Kullorsuarmeersut sulilermata tunisassiorfimmi sulineq allannguiffigineqarsimavoq.

- Iluaqutaaqisumik suleqatigiiaat marlunngorlugit unnuakkut sulisarnerit aallartinneqarput , tunisassialli eqqunngitsumik nalunaaqqutsersorneqartalersimasut paasineqarmat unnukkut sulisoqarneq piaartumik unitsinneqarpoq. Taamaakkaluartoq ullormut 30 tonsit tungaanut suli tunisassiarineqartarput. Unnukkoortoqartarunnaaraluartoq paasivarput ullormut 30 tonsit missaat suli tunisassiarisinnaallutigit, taamaammallu maanna sulisoqarneq naammagisimaarnarpoq, Kirsten Jensen erseqqissaavoq.

Unammillernartissimavaat

Kullorsuarmiit suliartortitat suliffissaaleqisuupput, juulillu aallartilaarnerani sulilerlutik. Suliartortitat sulivallaannginnisssaat anguniarlugu aallaqqaammut ullormut nalunaaquttap akunneri arfinillit sulisarsimapput. Kingorna ullormut nalunaaquttap akunneri arfineq-pingasut sulisaleramik sulisut ilaannut unammillernartinneqarsimasoq, Kirsten Jensenip oqaatigaa.

- Maannakkut tunisassiornermik suliaqartut 30-nit amerlanerulaarput. Eqqiaasut, qerisunik unnukkut inaarsaasut, tunitsivimmi sulisut, allaffimmiut, saffiuut, kantiinami,laboratoriami errorsivimmilu sulisut ilanngullugit 72-it sulisorineqarput.

- Soqutigisaqaqatigiit umiarsuaataat tunitsiviusut Uummannami tunisassiorfimmi sulisoqarniarnikkut akornusiissanngippata umiarsuit sulisoqareerlutik tikittarnissaat kissaatiginarpoq, Kirsten Jensen naggasiivoq.

Allattoq: Nathan Kreutzmann, nakr@royalgreenland.com

Assit: Kirsten Jensen

Asseq

 
 

Royal Greenland aperiguk

i
Write the text from the image