- Siullermik Naalakkersuisut aalisakkanik nunatta imartaaneersunik tunisassianik Japanimi tunisisarnerup patajaallisarneqarnissaanik anguniagaqarusunnerat tapersersorniarlugu peqataavugut. Taama oqarpoq, Jens K. Lyberth Japanimi apriilip 25-aniit 29-ata tungaanut inuussutissarsiutinik kulturinillu pilerisaarisoqarmat Royal Greenland sinnerlugu peqataasoq.

Inuussutissarsiutinik kulturinillu Tokyomi pilerisaarisoqarmat inuussutissarsiutilerinermik kulturilerinermillu aallutaqartut arlallit kiisalu Naalakkersuisut siulittaasuat Kim Kielsen aamma Aalisarnermut Naalakkersuisoq Karl-Kristian Kruse peqataapput.

- Niueqatigisartakkavut Naalakkersuisunut aamma ilassitikkusukkatsigit taamatuttaaq Japanimi suleqatitta nunatsinni Naalakkersuisut naapinniassammatigit tunisassiatsinnillu niueruteqarnerup tungaatigut ilisimasatik periarfissallu takutinniassammatigit peqataavugut, pisortaq Jens K. Lyberth oqarpoq nangillunilu:

 - Japanimiut pisisartuminnut atassuteqarluarnissartik pingaartippaat. Taamaattumik nunatsinni naalakkersuisunik naapitsinerat atassuteqartarnitta patajaallisarnissaanut iluqutaassaaq, taamaasilluta Japanimi niuernermik ingerlatsinerput annertusinissaanut atatillugu ikioqatigiissinnaanngussagatta.

Pitsaassuseq pingaaruteqarpoq

Royal Greenland 1988-imili japanimi aalisakkanik niueruteqartalerpoq, aallaqqaataanilu nioqqutissanik eqqussuisoq aqqutigalugu raajanik tunisisarluni. Tamatuma kingorna qalerallit Japanimi aamma nioqqutaallualerput. Royal Greenlandip Japanimut maanna tunisartagai ukiumut 550 millioner koruuninik isertitaqarfiusarput.

Jens K. Lyberth oqarpoq, japanimiut tunisassiassanik nutaanerpaanik piserusuttarmata tunisassiassat Japanimut tunineqartartut pitsaassusaat qaffasilluinnartariaqartut. Taamaattumik niuernermi akunnermuliuttut ikinnerpaaffissaaniitikkumallugit Royal Greenlandip Japanimik niueqateqartarnini ukiut ingerlaneranni naleqqussarpaa.

- Tunisassiatsinnik niuerfigisartakkatsinni soorlu niuertarfissuarni neriniartarfinnilu saqqummiinitsinni pitsaassuseq sammineqartuarsinnarpoq. Taamaattumik Naalakkersuisuni ilaasortat maanna eqqumaffigilerpaat, tunisassiassanik suliarinnittarnerit ilaat Kalaallit Nunaanni ilaallu nunani allani soorlu Kinami ingerlatissallugit naleqqunnerusoq, Jens K. Lyberth oqarpoq.

Jens K. Lyberth oqarpoq, Kangiani niuerutigineqartartut annertussusaat 2018-imi marloriaatinngortinneqarnissaat Royal Greenlandimit anguniarneqartoq.

- Tamatumani Japanimi niuerneq aamma pineqarpoq. Kangianilu niuerutigisartakkatta annertussusaannik marloriaatinngortitsinissatsinnut anguniakkatta angunissaanut niuerutigisinnaaasatsinnik tunisassiassaateqartariarpugut tunisassiornerulertariaqarlutalu. Tamatuma saniatigut siunissaq ungasinnerusoq eqqarsaatigalugu niuerfinni aalisakkanik niueruteqarnermik aallussisartut annersaat peqatigalugit tunisisarnissaq pillugu isumaqatigiissusiussaagut aamma soorlu niuertarfissuillu Kangiani amerliartortuartut peqatigalugit isumaqatigiissusiussalluta, Jens K. Lyberth oqarpoq. Taamatuttaaq isumaqarpoq, Japanimi inuussutissarsiutinik pilerisaarinermi Japanip Kalaallit Nunaatalu niueqatigiillualernissaannut tunngaviliisoqartoq.

- Inuussutissarsiutinik pilerisaarineq Naalakkersuisut uagullumi Japanimi niuerneq annertusiartortoq pillugu ilisimasaqarnerulernissatsinnut periarfissiivoq. Tamatuma saniatigut Japanimut atassuteqarnerput annertuseriarpoq, tamannalu suleqatigiilluarnissamut tunngavitsialaavoq, Jens K. Lyberth naggasiivoq.

Pisortaaneq Mikael Thinghuus aamma siulersuisuni siulittaasoq Niels Harald de Coninck – Smith Japanimi inuussutissarsiutinik kulturinillu pilerisaarisoqarmat Royal Greenland sinnerlugu aamma peqataapput.

Allattoq: Inga Egede, ineg@royalgreenland.com

Assit: Jens K. Lyberth

Asseq

 
 

Royal Greenland aperiguk

i
Write the text from the image