- Aalisakkanik qerititerutip pladefryserip sigginneratigut ammoniakimik aniasoorneq sisamanngormat ualikkut pivoq. Saarullinnik, qaleralinnik, qeeqqanik aammalu saattuanik nioqqutissianik naammasseriikkanik maannamut tonsinik qulit sinnerlugit igitsereerpugut, Qeqertarsuarmi Royal Greenlandip tunisassiorfiani tunisinermi tunisassiornermilu ingerlatsisoq Karl Julius Broberg oqarpoq.

Qatserisartut atortorissaarutaat atorneqarput

Sisiamanngormat ualikkut nalunaaqutaq 16:45 missaani ammoniakkimik aniasoorneq pimmat aalisakkanik tunisassiorfimmi sulisut pingasut erngertumik aalisakkerivimmi ajutoorfimmiit anipput. Tunisassiorfimmilu aqutsisut mekanikerinik amoniakimik aniasoortoqartillugu ilimasasalinnik aaammalu ajutoornerni taamaattuni sulisinnaanermut akuersissuteqartunik ikiortissarsiorput.

- Aniasoorneq annertuujusoq paasigatsigu qatserisartut atortorissaarutaannik attartorluta mekanikerit tunisassiorfimmi ajutoorfiusumut iserlutik pladefryserip siggiffia iluarsaappaat. Aniasoorneq sisamanngornermi unnukkut unitsinneqarpoq, kisiannili ajutoorfiusoq tamaarmi salinneqareerlunilu silaannarissarneqareermat tallimanngormat ajutoorfiusumi sivikitsuinnarmik isersimasoqarsinnaammat tunisassiorneq aatsaat ullumi aallarteqqinneqarpoq. Pladefryserimi amoniakip aniaffigisaa maanna siminneqareerpoq aammalu tunisassiornermi atortut tamarmik salinneqareermata tunisassiorneq aallarteqqippoq, Karl julius Broberg oqarpoq.

Nioqqutissiat naammasseriikkat tonsit qulit aammalu 115 kiilut ajutoorfiup ungasinngisaani quersuarmi qerinasuartitsivimmiittut maannaiginneqareerput, nioqqutissialli naammasseriikkat quersuarmi qerinasuartitsivimmi allamiittut qanoq annertutigisumik ajoquserneqarsimanersut suli paasineqanngilaq.

- Suli nioqqutissianik naammasseriikkanik igitseqqittariaqarumaarnerluta ilimanngilarput, Karl Julius broberg oqarpoq.

Saattuat 1678 kiilunik annertussusillit maanna aserorterneqarlutik iginneqareerput aalisakkalli kasiilikkat iginneqarnissaasa tungaanut isumannaatsumi immikoortillugit inissinneqarput.

Allattoq: Inga Egede, ineg@royalgreenland.com

Assit: Karl Julius Broberg

Asseq

 
 

Royal Greenland aperiguk

i
Write the text from the image