- Aalisarut pisaannik nunakkut qamuteralammik assartuineq aalisartut sivisunerusumik aalisarfimmiissinnaanerannik periarfissiivoq. Sapaatip akunnera tikillugu illuaqqani unnuisinnaapput taamasillutillu pisat annertunerujussuit pisarisinnaanngorlugit, tamannalu aamma ukioq naallugu Royal Greenlandip tunisassiorfiani suliassaqartitsinnaanermik pilersitsivoq, Royal Greenlandimi aalisarnermut siunnersorti Therkel Mathiassen oqarpoq.

Ilulissani aalisartut ukioq kingulleq aamma taamatut periarfissinneqarput.

- Siorna aaqqissuussineq iluatsilluarpoq aalisartut 20-it 30-illu akornanni amerlassuseqartut sikumi aalisarnermi qalerallit 100 tonsit missingi tulaappaat. Qimussimik aalisarfimmiit Ilulissanut uteqattaarlutik pisaminnik tunisisarnerminni 30 tonsit missingi tunisaramikkit pisanik qamuteralannik assartuisarneq annertunerujussuarmik isertitaqassugisinnaavaat, Therkel Mathiassen oqarpoq, nangipporlu:

- Siorna pisanik qamuteralannik assartuisinnaanermut akuersissut aatsaat februarip naajartornerani tunniunneqarpoq, akuersissummilli tunisineq kingusinaarunneqarsimammat ukioq siusinneruskkut piareersarismavugut taammattumillu maanna tassa aalisartut sikumi pisaannik qamuteralannik assartuineq aallarteriaannaavoq.

Assartuineq

Suleqatigiilluni aaqqissussuussineq aaqqissuunneqarpoq Ilulissat kangiani 22-25  kilumiiterinik ilorpasitsigisumi qimusserlutik sikumi aalisartut kilumiiterit tallimat arfineq marlullu akornanni  isorartussuseqartumi pisatik nunamut assartortassagaat. Pisat paaliarsuarnut 250 kiilut tikillugu imaqarsinnaasunut issoraanneqartassapput, taakkulu paaliarsuit atilersorneqarsimallutillu nalunaaqutsersukkat 22- 25 kilumiiterit missaannik isorartussusilik ingerlaarfigalugu qamuteralannik assartorlugit Royal Greenlandip tunisassiorfianut apuuneqartassapput.

Aalisartut sikumi qaleralinniartut 15-it 20-illu akornanni amerlassuseqartut Ilulissani Royal Greenlandip tunisassiorfianut tunisisarput.

Aalisartut pisaannik qamuteralannik assartuisinnaanermut akuersiisut Qaasuitsup Kommunea aqqutigalugu Namminersorlutik oqartussanik akuersissutigineqarpoq.

Ilulissat kangiani aalisartut pisaannik qamuteralannik assartuinissaq Ilulissani aalisartut, Ilulissat Fiskeriservice I/S aammalu Royal Greenlandip suleqatigiinneratigut piviusunngorpoq. Qamuteralaat nunakkut aalajangersimasukkut ingerlaarfeqarlutik aammalu nunakkuinnaq ingerlaarlutik assartuisarnissaannik piumasaqaateqarnikkut kangerlummi nunarsuarmi kingornussassat pillugit UNESCO-p allattugaataaniittup timaatigut qamuteralaat ingerlaarsinnaanerat akuerineqarpoq.

Allattoq: Inga Egede, ineg@royalgreenland.com

Asseq: RG

Asseq

 
 

Royal Greenland aperiguk

i
Write the text from the image