Suliffeqarfiup Royal Greenlandip Canadami suliffeqarfimmut aalisakkanik tunisassiornermik aallutaqartumut Quin-Sea Fisheries Limited-imut aningaasaliinera Royal Greenlandip nalunaarutigisinnaallugu nuannaarutigaa.

Suliffeqarfik Royal Greenland Atlantikup Avannaata imartaani aalisakkanik aalisarnermik, tunisassiornermik tuniniaanermillu ukkassilluni tamakkiisumik ingerlataqartuuvoq. Royal Greenland ukiumut 5 milliarder koruunit missiliorlugit kaaviiaartitaqartartutut nunarsuarmi suliffeqarfinni raajanik issittup imartaaneersunik, qaleralinnik Kalaallit Nunaata imartaaneersunik nipisallu suaannik tunisassiortartuni anginerpaavoq.

Quin-Sea Fisheries annerusumik saattuanik raajanillu issittup imartaaneersunik ilaatigullu siuteqqunik imarmiunik, inalugalinnik, ammassannik saarullinnillu annertunngitsunik ukiumut 11.000 tonsinit annertunerusunik tunisassiorlunilu tunisaqartarpoq. Suliffeqarfik nunami tunisassiorfinnik arfinilinnik ingerlataqarpoq, ukiumut 60 millioner CAD-inik kaaviiaartitaqartarpoq ulapiffinnilu 700-nik sulisoqartarluni.

Fred Hopkins aamma Derrick Philpott Quin-Sea Fisheriesimik piginnittuullutillu ingerlatsisuupput suliffeqarfimmilu sulinertik ingerlatiinnassavaat. Quin-Sea Fisheriesip aqutsillaqqissunik sulisoqarnini aamma Newfoundlandimi Labradorimilu aalisartunut qanimut atassuteqarluartuunini tusaamaneqaatigilluarpaa. Derrickip Fredillu niunernikkut siuttumik tassa Royal Greenlandimik piginneqateqalernertik nuannaarutigisupilussuaat. Derrick aamma Fred oqarput:

- Royal Greenlandimik suleqateqalernerput aqqutigalugu New Foundlandimi Labradorimilu aalisakkanik tunisassiornerit ineriartorteqqinneqarnissaannut periarfissarujussuaqalernertut isigaarput. Suliffeqarfiup ineriartortittuarnissaa eqqarsatigalugu Canadami aalisakkanik tunisassiornermik aallutaqartut siuariaateqartuartarnissaat pingaaruteqarpoq, tamannalu anguniarlugu Royal Greenlandimik peqateqalernerput pingaartipparput.

Royal Greenlandimi pisortaaneq Mikael Thinghuus oqarpoq:

- Fred aamma Derrick kiisalu Quin-Sea qaammatit arlallit kingulliit ingerlaneranni ilisarisimalluarlerpavut, suliffeqarfiillu marluk pineqartut suleqatigiilernerat naleqqulluinnartuusoq qularinngilluinnarparput. Suliffeqarfiit marluullutik sineriammi aalisarneq aalisakkanillu tunisassiorneq pillugu ilisimasaqarluarneq kiisalu pilersuisut sulisullu najugaqarfianni suliffigisaannilu inuiaqatigiinnik ataqqinnilluarneq tunngavigalugit ingerlatsisuupput.

- Tamatumani aningaasaliineq arlalitsigut iluaqutissartaqartoq ilimagaarput. Quin-Seap tunisassiai Royal Greenlandip tuniniaasarfeqarfianit angisuujusumit nunanilu assigiinngitsuni immikkoortortaqartumit tuniniarneqartalissapput, uagullu Kalaallit Nunaata imartaani aalisakkat pissuseqatigiiaat maanna aalisarneq ajukkavut tassa siuteqqut imarmiut aamma inalugallit pillugit ilisimasaat iluaqutigisinnaavagut.

Thinghuus nangippoq:

- Suliffeqarfiit allat aalisakkat pissuseqatigiiaat aalisartakkatta, tunisassiarisartakkatta tunisartakkattalu assingannik aalisarnermik, tunisassiornermik tunisinermillu aallutaqartut unammillertiginerpaasatut isigeqqajaasarpavut. Tamannali isumaga malillugu kukkuneruvoq annertooq, tamatumanilu Royal Greenlandimi allatuulli kukkorujussuarsimanerput nassuerutigikutsoorsinnaavara. Unammillertiginerpaasavummi tassaapput aalisakkat pissuseqatigiiaat allat – assersuutigalugu atuisut raajat issittup imartaaneersut pisiarisartakkatik raajanik immamit kissarnerusumeersunik ilaatigullumi allaat pissuseqatigiiaanik allarluinnarnik proteinitalinnik soorlu kukkukuuaqqanik, puulukip neqaanik aamma nersussuup neqaanik taarsersinnaasarpaat.

- Aalisakkanik niueruteqartartut silarsuaat akuuffigisarput avissaartuuffiusupilussuuvoq. Allaallumi suliffeqarfiit anginerit pisisinnaassusaat niuertarfeqarfiit amerlasuunngorlugillu tunisisartut pisisinnaassusaannut sanilliukkaanni annertunngillat. Niuerfinni pioreersuni ineriartorfiusunilu aningaasaliisinnaaniarutta niuerfinnillu nutaanik pilersitsiniarutta pingaarnertut aallutatta tungaatigut patajaannerusumik inissisimalernissarput suleqatigiinnerunissarpullu pingaaruteqarpoq. Patajaallisarneq suleqatigiinnerlu nunat killeqarfii aalisakkanit atuisartunillu aamma soqutiginaateqangaanngitsut apeqqutaatinnagit anguneqassaaq. Quin-Sea Fisheriesimut aningaasaliineq Royal Greenlandip pingaarnertut aallutaasa siuariaateqarnissaannut alloriarneruvoq siulleq pingaaruteqarluinnartoq.

Tunisassiorsinnaanermut allagartanut "Change of operator"-inut Quin-Sea Fisheriesimit pigineqartunut tunngatillugu ”Provincial Government of Newfoundland and Labrador” – tassaasut Newfoundlandimi Labradorimilu naalakkersuisut - akuersissuteqarnerat naapertorlugu Royal Greenland aningaasaliivoq.

Nuuk, decembarip pingajuat 2015

Mikael Thinghuus
Pisortaaneq, Royal Greenland

Asseq

 
 

Royal Greenland aperiguk

i
Write the text from the image