- Saarullinnik maskiinamik panertitanik tunisassiornermi atortorissaarutit ilaat suli piariinngilaq, kisiannili sapaatip akunnerani aggersumi piareernissaa ilimagigatsigu sapaatip akunnerata tulliani panertitsitineq aallartissallutigu naatsorsuutigaara, Maniitsumi Royal Greenlandip tunisassiorfiani ingerlatsisoq Lisbeth Østergaard oqarpoq.

Maniitsumi tunisassiorfik Arctic Greenfoodimit ingerlanneqarnikuusoq 2013-imi Royal Greenlandimit ingerlanneqalermat saarullinnik panertitsinermi atortorissaarutit pioreersut atorlugit panertitsineq ingerlanneqarpoq. Kisiannili 2014-imi Maniitsumi tunisassiorfik qalerallit aammalu saarullit nerpiinik, ilaatigullu aamma saarulliit nerpiinik immikkut tunisassianik Nutaaq* Cod-inik tunisassiorsinnaanngorlugu sanaqqinneqarmat saarulliit nerpiinik panertitsineq unitsinneqarpoq. Maanna panertitsinermi atortorissaarutit nutarterneqareerlutik saarullinnik panertunik tunisassiorneq aallarteqqittussanngorpoq.

Nuummi ilinniarpoq

- Sulisutta ilaat saarullinnik panertitsineq pillugu Nuummi Royal Greenlandip tunisassiorfiani ilinniartinneqarpoq, maannalu Nuummi tunisassiorfik suleqatigalugulu maani tunisassiorfimmi saarulliit nerpiinik panertitsitineq taassuma ingerlatissavaa, Lisbeth Østergaard oqarpoq.

Saarullinnik panertitsisarneq pillugu pikkorissarneqareerluni Pavia Kristiansen Maniitsumi tunisassiorfimmi saarullinnik panertitsinermi suliaqartussaq oqarpoq qanoq annertutigisumik panertitsisisarsinnaajumaarnerlutik suli ilisimaqqissaarnagu aamma panertitsinermi atortorissaarutit nutarterneqareernerisa kingorna suleriusissartik suli naatsorsoruminaammat.

- Saarullinnik panertitsinermi suliaqarneq peqqissaaruteqqissagassaavoq, taamaattumik aamma inunnik marlunnik pingasunilluunniit suleqateqassaanga. Tunisassiassat panersinnginnerini imermik tarajulimmi kininneqaqqaartarput kingornalu panersiivimmi aalajangersimaaffaarissumik kissassusilimmi sapaatip akunnerata missaani panerserneqartussaapput, Pavia Kristiansen saarullinnik panertitsinerni akisussaasutut suliassinneqarnini pilllugu tulluusimaartoq oqarpoq.

- Suliamik akisussaaffimmillu tunineqarnera tulluusimaarutigalugulu nuannaarutigeqaara. Inuuninni aatsaat suliamik taama annertutigisumik pissanganartigisumillu suliassinneqarpunga, tamannalu unammillernarpoq, Pavia Kristiansen oqarpoq.

Royal Greenlandimi Nunatsinni tunisassianik tuniniaavimmi tuniniaanermik ingerlatsisoq Malik Hegelund Olsen oqarpoq saarulliit panertut piumaneqarnerat annertusiartuinnartoq.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image