- Aappilattup eqqaani saarulleqarluarlunilu qaleraleqarluarmat aalisarluartoqarsinnaanera periarfissagissaarpoq. Imeqarfik imermik minguaammik nutaamik ikkussivigineqaqqammerpoq taamatuttaaq innaallagissiorfik nutaanik pingasunik generatoritaaqqammerpoq. Minnerunngitsumillu aalisartut avataaneersut unnuiffigisinnaasaannik Royal Greenlandi illusinikuummat ukiumi nutaami aalisartut Aappilattumi tunisassiorfimmut tunisilluarnissaat neriulluarfigaara, Narsami Royal Greenlandip tunisassiorfiani ingerlatsisoq aamma Aappilattumi tunisassiorfiup ukiut qulit matoqqareerluni siorna ammarneqartumut akisussaasuusoq Niels Sakariassen oqarpoq.

Iliuuseqarneq

Aappilattumi tunisassiorfik siorna novemberimi ammarneqarmat qaammatit siuliit nunaqarfimmi aalisartut tunisassiorfimmut tunisilluarsimagaluarput, kisiannili 2015-i aallartimmat nunaqarfimmi aalisarneq uniimisimavoq.

- Tamanna allanngortinniarlugu ukiariartornerani iliuuseqarsimavugut. Nunaqarfimmi aalisartut ataatsimeeqatigaavut, kingornalu aalisartut amerlanerusut aalisalerput. Aalisariut Royal Greenlandip pigisaa Aluk Aappilattumut tunisisalerpoq. Taamatuttaaq aalisartut nunaqarfimmi Narsarmiuneersut tunitsivimmut tunisisalermata ukiariartornerani tunitsivimmut tunisat annertusiartulerput, Niels Sakariassen oqaluttuarpoq.

Piginnaasaq qaffanneqarsinnaavoq

Aappilattumi tunisassiorfimmi aalisakkat ullormut tonsit sisamat qeritinneqarsinnaapput quersuarmilu qerititsiviutigisumi tonsit 70 –it uningasuutigineqarsinnaallutik. Tunisassiorfimmi inuit pingasut sulisorineqarput.

Niels Sakariassen isumaqarpoq Aappilattumi tunisassiorfiup piginnaasai qaffatsinneqarsinnaasut.

- Neriuutigaara tunisassiorfimmut tunisineq qaffakkumaartoq tunisassiorfiup piginnaasaasa qaffatsinneqartariaqalerneranik nassataqartumik. Aappilattup eqqaani avataanilu aalisagarpassuaqarmat nunaqarfimmilu imeqarniarneq aammalu innaallgiaqarniarneq aaqqiivigineqareermata kiisalu aalisartut avataaneersut unnuiffigisinnaasaannik illumik pilersitsoqareermat nunaqarfiup tunitsivianut tunisinerup qaffanneqarsinnaanera periarfissagissaarpoq, Niels Sakariassen oqarpoq naggasiutigalugulu ima oqarpoq:

- Kisianni maani aalisartut aalisarnermi atortunik nutarterinissaannut periarfissiisumik pisortat tapiissutaannik ESU-mik suli tapiissuteqartoqannginnera uggoraara. Aalisartummi Aappilattumi tunitsivimmut tunisisartut amerlanerpaartaat aalisaatit nutaaliaasut atornagit suli assaannarminnik aalisarput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image