Nunaqarfiup innaallagissiorfiani maskiinat pingasuusut ataaseq arfinngormat ullaakkut ikuallappoq. Aalisakkerivimmi qerinasuartitsivik aammalu quersuaq qeritsitsiviutigisoq ataatsikkut ingerlatissallugit maskiinat marluusut sarfamik pilersuinerat naammanngimmat aalisakkerivimmut tunisineq unitsipparput, Narsami aalisakkeriviup pisortaa Niels Sakariassen maanna Aapilattumiitttoq oqarpoq.

Niels Sakariassen oqarpoq nunaqarfiup innaallagissiorfia pillugu qanoq pisoqarumaarneranik Nukissiorfiit nalunaaruteqarniarlutik neriorsuimasut.

- Uagut qanoq iliuuseqarnissarput eqqarsaatigalugu Nukissiorfiit qanoq iliuuseqarniarnerlutik nalunaaruteqarnissaat utaqqiinnarparput.

Niels Sakariassen oqaluttuarpoq tunisineq sisamanngormat aamma unitsinneqareersimasoq, tallimanngormat ammaqqikkaluartoq, kisiannili tassa arfinngormat matoqqittariaqarsimasoq.

- Sisamanngormat innaallagissiorfiup tamakkiisumik pilersorsinnaasimanngilaatigut, taamaattumik tunisineq unitsipparput. Tallimanngormat ammaqqikkatta aalisartut qalerallit tonsip ataatsip missaaniittut tunivaat, taakkulu qerinasuartitsivik atoriarlugu kingorna quersuaq qeritsitiviusumut inaalissinnaasimavavut.

-Tallimanngormat quersuaq qaleralinnik tonsinik arfineq pingasunik annertussuseqartunik imaqartoq imaarneqarpoq. Kisiannili ullaaq aalisariut Nanortalimminngaaneersoq tunisiartorluni tikimmat immikkut akuersissummik pillluta qalerallit 625 kiilut tiguagut. Immikkut akuersissimmuk pinissatsinnut akuerineqarpugut qerinasuartitsiviup akunnerni pingasuni atornerani quersuaq qerititsiviutigisoq qaminngatissinnaagutsigu, taamaaliorpugullumi, Niels Sakkariassen nassuiaavoq oqarlunilu maanna qalerallit 625 kiilut aammalu ammassaat neqitassatut atugassat 10 tonsit missaannik annertuususeqartut quersuarmi qeritsitsiviutigisumi uningasuutigineqartut.

- Uggornaraluaqaaq tunitsivik matusariaqaratsigu, maannakkummi Aappilattup eqqaani qaleraleqarluarpoq aammalu sila angalaffigiuminsarsilluni. Ajoraluartumilli maannakkorpiaq allatut iliorsinnanngilagut. Imaappormi tunisassiorfimmi maskiinat tamaasa atussagaluarutsigit innaallagissiorfik artorsalissaaq tamannalu nunaqarfiup innaallagissamik pilersorneqarneranut ajoqutassaaq, Niels Sakariassen oqarpoq.

Allattoq: Inga Egede, ineg@royalgreenland.com

Asseq: RG

Asseq

 
 

Royal Greenland aperiguk

i
Write the text from the image