Kilisaatip Lomurip Qeqertarsuup Tunuani raajarniarnera sikuernissaata tungaanut unitsiinnartariaqartoq kilisaatip naalagaata Hans Lennertip aalajangertariaqarsimavaa.

- Kilisaatip ajoquteqarnera pissutigalugu sapaatip akunnera ataaseq Ilulissani uninngareerluta januarip 29-ani avalappugut. Ullorli ataasiinnaq aalisarfimmeereerluta aalisarfipput sikummat Ilulissanut utiinnartariaqarsimavugut, Hans Lennert oqarpoq. Taanna aamma oqarpoq piginnittut kilisaatip Ilulissaniiginnarnissaa aalajangeraat.

- Kujasinnersumi sikoqanngitsumi aalisarsimasinnaagaluarpugut, kisiannili raajat pisassat ikilinikuummata kilisaammik piginnittut aalajangerpaat aalisarfiusartup sikuernissaata tungaanut Lomur Ilulissani umiarsualivimmiiginnassasoq.

Kilisaammi inuttat quliusut maskiinalersut marluk eqqaasanngikkanni aalisaqqilernissamik tungaanut illoqarfimminnut angerlarlutik sulinngiffeqarallarput.

- Ilungersunaqaaq aalisartut aningaasarsiorsinnaanngimmata aammalumi ataatsimoorluta piginnittut inuiaqatigiillu aningasarsiuussinnannginnatsigit. Uagummi inuttavut kisimik aningaasarsiorunnaanngillat, aalisariutilli allat Qeqertarsuup Tunuani raajarniartut aamma sikunera pissutigalugu aalisarunnaarput tamassumalu aamma nassataraa raajanik tunisassiorfimmi sulisut angerlatiinnarneqarnerat, Hans Lennert oqarpoq.

Kilisaat Lomur Gaia Fish Aps-imit pigineqarpoq. Piginneqatigiiffik taanna Ice Trawl Aps –imit Royal Greenland A/S-imillu pigineqarpoq.

Allattoq: Inga Egede, ineg@royalgreenland.com

Assit: Hans Lennert

Asseq

 
 

Royal Greenland aperiguk

i
Write the text from the image