- Aalisartut qaleralinnik angisuunik tunisisarput, tunisat 90 procentii 10 kiilut missaanni angissuseqartarput. Qalerallit tunineqartartut alliartortut maluginiarpara, soorlu 90-ikkunni taammaattoq, Kullorsuarmi tunisassiorfimmi ingerlatsisoq Jørgen Adam fisker oqarpoq.

Kullorsuarmi qaleralinnik tunisineq januaarip tallimaani ammarpoq. Taassuma kingorna maannamut qalerallit 45 tonsit tunineqareerput. Qaleralinniarnermi aalisartut 40 –it missingi nunaqarfimmiit kilumiiteri ataaseq avasitsigisumi aalisarnermi peqataappput. Aalisartut amerlanerit qamuteralannik aalisariartarput pingasut sisamat qimussimik aalisariartarlutik. Aalisartut sikumi illuaqqani tuperniluunnniit unnuisarput.

Aalisartut illuaqqat unnuisarfitik tunisineq aallartikkaanga sikumut assartortarpaat, ullualunnguillu aalisarnerminni tassani unnuisarput. Upernaakkut sikumi aalisarneq unikkaangat illuaqqat unnuisarfitik nunaqarfimmut assartoqqittarpaat.

- Piffisami kingullermi 35-it angullugit aalisarfimmilu ilaatigut 50-it angullugit issittaraluartoq taamaattoq aalisartut ullut marluk pingasut illuaqqani unnuisarlutik aalisareeraangamik tunisiartortarput, Jørgen Adam Fisker oqaluttuarpoq.

Oktoberip aallaqqaataani 2014-imi Royal Greenlandip Kullorsuarmi tunisassiorfik tigusaa qalerallit 600 tons angullugit qeritsitsisinnaavoq, kisiannili ukiut arlaqartut matuma siornatigut qerititsivik ataaseq atorsinnaajunnaarmalli qalerallit taamaallaat 470 tonsit qeritinneqarsinnaasimapput.

- Quersuaq qerititsiviutigisoq majimi ulikkaarnissaa naatsorsuutigaarput. Taamalinerani qaleralinniarneq suli ingerlaruttortussaavoq. Nalinginnaavoq qalerallit upernaakkut suli anginerusartut, taamaattumik annertunersunik tunisassiorsinnaaneq anguneqarnissaa kissaatiginaraluarmat neriuutigigaluaqaarput qerititsiviup aserornikup iluarsipallannissaa, Jørgen Adan Fisker oqarpoq.

Aasaanerani sikueraangat Kullorsuarmi aalisartut nunaqarfinnut qanittuniittunut Tasiusamut, Innaarsunnut aammalu Nutaarmiunut tunisisarput.

Allattoq: Inga Egede ineg@royalgreenland.com

Assit: Jørgen Adam Fisker

Asseq

 
 

Royal Greenland aperiguk

i
Write the text from the image