Saarulliit issimit panertitat Nuummut nasssiunneqartut qaammatit marluk missaanni panertitsivinni panerserneqarput. Saarulliit panertut scantainerinut ikillugit Nuummut nassiuppaggut, Kangaamiuni tunisassiorfimmi ingerlatsisoq Peter Kreutzmann taama oqarpoq.

Saarulliit issimi panertitat amerlanerpaartaat Kangaamiut eqqaanni kangerlunni ningittakkanik qassutinillu pisarineqarput, ilaalli Paamiuninngaaneersuullutik.

Ukioq kingulleq piffissami oktoberimiit marsimut Royal Greenlandimi nunatsinni tunisassiassanik tuniniaavik saarullinnik issimit panertitanik tonsit qulit missaannik annertussusilinnik tunisassiorpoq. Taakkunannga tonsit arfineq pingasut Kangaamiut tunisassiorfiata panertitsiviani panertinneqarput.

- Neriuutigaarput aamma ukioq manna tonsit arfineq pingasut angullugit tunisassiorsinnaassalluta. Ajoraluartumik ukioq manna panertitat siulliit 900 kilunik oqimaassusillit novembarimi igittariaqarsimavavut silap issangiarnera pissutigalugu iluatsinngitsoormata. Taamaattumik angorusutarput angusinnaassaneripput silap kisimi aalajangersinnaavaa, Peter Kreutzmann oqarpoq.

Maannamut Royal Greenland saarullinnik issimit panertitanik tunisassiorsinnaanissamut Kangaamiuni aammalu Uummannami periarfisaqarsimavoq, aammalumi sumiiffinni taakkunani siorna saarulliit issimut panertitat tunisassiarineqarlutik. Kisiannili Royal Greenlandip Arctic Green Foodip tunisassiorfiinik tigusinerata nassatarisaanik ukioq mannamiit Attumi, Ikamiuni aammalu Akunnaami saarulliit issimi panertitat tunisassiarineqarsinnaalerneratigut Royal Greenlandip saarullinnik issimi panertitanik tunisassiornini marloriaatinngortinniarpaa.

- Ukioq manna saarulliit issimi panertitat 20 tonsit angullugit tunisassiarinissaat anguniarniarparput. Ukiuni kingullerni saarullinnik issimit panertitanik panertitsiniarneq silap issangiarnera pissutigalugu ajornakusoorsimavoq ajoraluartumillu tunisassiassiariniakkatta ilaat igittariaqartarsimavavut. Taamaattumik anguniagarput angusinnaassaneripput silap aalajangiivigissavaa, Nunatsinni tunisassianik tuniniaavimmi ingerlatsisoq Malik Hegelund Olsen taama oqarpoq.

Allattoq: Inga Egede, ineg@royalgreenland

Assiliisoq: Peter Kreutzmann

Asseq

 
 

Royal Greenland aperiguk

i
Write the text from the image