Efterskoleniartut tallimat, AFS allalluunniit aqqutigalugit nunani allani oqaatsitigut pikkorissarniartut arfineq pingasut, eqimattakkaanut ilinniartitsiniartut pingasut aammalu meeqqanut mikinernut kalaallisut, qallunaatut tuluttullu atuakkiassaq Royal Greenlandip ukioq manna aningaasaliissutigisinnaasaanik atorluaaniarput. Taamaasilluni pikkorissarniarluni tapiissutaannaat ukiumi naatsorsuiffiusumi 2014-2015-imi 570.000 kr-t tapiisarnermut ataatsimiititaliamit agguaanneqarput.

Lydie Petersen tapiiffigineqarnissamik qinnuteqartut 21-usut ilagaat, siunissamilu pilersaaruteqarpoq.

- Socialhjælperitut ilinniagaqarnera 2014-imi naammassivara. Socialassistentitut qallunaatuinnaq ingerlanneqartumi ingerlaqqikkusuppunga, nalunngilarali angusakka appasippallaartut. Iluatsitsillungali Royal Greenlandimit tapiiffigineqarpunga, taamaasillungalu Danmarkimut højskoleriarsinnaanngorpunga qallunaatullu angusakka pitsanngorsarlugit, Lydie Petersen 21-nik ukiulik Kullorsuarmilu meeqqat ornittagaanni sulisoq oqarpoq.

Royal Greenlandi tapiisarnermut maleruagassaqarpoq meeqqat atuarfianni atuartunut inuusuttunullu ilinniagaqartunut atuartitsissutini qallunaatut, tuluttut, matematikkimi pinngortitalerinermilu pingaarnertut tapiissuteqartartumik. Atuartitsissutit taakkorpiaapput Kalaallit Nunaanni meeqqat atuarfianni atuartut appasinnerpaamik angusiffigisartagaat. Suliffeqarfik atuartunut ilinniartunullu aammalu suliffissarsiortunut atuartitsissutini taakkartorneqartuni angusamikkut pikkorisarusuttunut tapersersuerusuppoq, taamaasillutik ilinniagaqarnissaminnut ingerlaqqinniassammata.

Tamatuma saniatigut aningaasarpaaluit Ivalo & Minik Fondenimut aammalu Arctic Winter Games 2016-imut ilinniagaqarnissamut siunertalinnik aningaasaliissutigineqartarput.

Timersornermut tunngatillugu Royal Greenland Kalaallit Nunaanni Timersoqatigiit Kattuffiannut ukiumoortumik isumaqatigiissuteqarluni aningaasaliisarpoq aammalu timersortartunut piukkunnaatilinnut kiisalu Arctic Cicle Racemut immikkut aamma tapiissuteqartarluni.

Tapiisarnermut tunngasut pillugit nittartakkami uani atuarsinnaavatit:

http://www.royalgreenland.gl/kl/CSR/Tapiissutit

Allattoq: Káte Hansen, kaha@royalgreenland.com

Asseq: Nammineq pigisaq

Asseq

 
 

Royal Greenland aperiguk

i
Write the text from the image