Royal Greenlandip Sisimiuni tunisassiorfiani raajanik uutanik qalipaajakkanik aammalu saattuanik tunisassiorfioreersumi saarulliit nerpiinik tunisassiornermi atortussanik Royal Greenland ilaatigut maskiinanik nutaanik aningaasaliivoq, taamaattumik saarulliit nerpiinik tunisassiorlutik sulisut inini iluarsaateqqammersuni sulissapput.

- Pilersaarutaavoq saarulliit nerpiinik tunisassiorneq bundgarnersorluni aalisarneq naammassereerpat ingerlaannassasoq. Taamaattumik aasaanerani bundgarnersorluni aalisarneq unippat saarullinnik akkersanik aammalu qassutinik pisananik tunisassiussaagut. Tassa imaappoq ukioq naallugu tunisassiassanik tigooqqaassaagut, tamannalu illoqarfimmi suliffissaqartitsiniarnermut pingaaruteqarpoq, Jan Jørgensen oqarpoq.

Suliarilluakkat

Aalisariutit anginerumaat umiatsiallu mikinerumaat bundgarnersorluni pisanik saarullinnik sikulersukkanik tunisassiassanik pilersuissapput.

- Saarulliit nerpiinik tunisassiornermi pitsaassuseq qaffasissumiitillugu tunisassiarissagaanni piumasaqaataavoq tunisassiaq nutaajullunilu suliarilluagaassasoq. Pitsaassuseq qaffasissoq atuutsiinnarlugu tunisassiat tunisassiarisinnaassallutigu naatsorsuutigaarput. Tunisassiat Europamut immikkullu Tuluit Nunaannut tunineqassapput.

Royal Greenlandip Sisimiuni tunisassiorfiani saarulliit nerpiinik tunisassiornerup aallartinneratigut sineriammi tunisassiorfiini sisamaasuni saarulliit nerpiinik tunisassiorneq ingerlanneqalerpoq, tassami aamma Royal Greenlandip Paamiuni, Maniitsumi Kangaatsiamilu tunisassiorfiini saarulliit nerpiinik tunisassiorneq aasaq manna allartinneqarpoq.

- Tunisassiassat amerlinerisigut akilersinnaasumik tunisassiornissaq aammalu tunisassiornermi pitsanngorsaaneq pilerinarsisarpoq. Tunisassiornerlu imminut akilersinnnaavoq saarulleqarluarmat, Jan Jørgensen naggasiivoq.

Allattoq: Inga Egede, ineg@royalgreenland.com

Assit: Jan Jørgensen

Asseq

 
 

Royal Greenland aperiguk

i
Write the text from the image