Sinneqartoorutit akileraannginnermi 85 millioner koruuniupput, akileraareernermilu 50 millioner koruuniullutik. Angusaqarluarneq pissutigalugu Royal Greenlandip patajaassusaa suli pitsanngoriartuinnarpoq procentinngorlugu 37-iulluni. Nammineq pigisat 1,2 milliarder koruuniupput.

Akiitsut ernialersukkat nakkutigineqarluartut siornatut inissisimapput, taamalu 1 milliard koruunit suli ataassimallugit.

Ukiup siulianut naleqqiullugu angusatigut pitsanngoriaatit 26 millioner koruuniusut Royal Greenlandip pingaarnertut aallussaatigut, raajatigut qaleralitsigullu isertitaqaataapput.

Siuariaatit anguneqarsinnaasimapput naak ingerlatsinikkut ilungersunartunik annertuunik nalaataqartoqarsimagaluartoq, tassa raajartassiissutinik annikinnerusunik ukiuuneranilu sikuunerujussuanik taamalu tunisassiorfinnik matusisariaqarallartarnernik aammalu kilisaatit aalisarnerliornerannik kinguneqartumik peqquteqartunik.

Isertitaqarneruneq pingaartumik tuniniaanermi qaffasinnerusunik akeqartitsinermik peqquteqarneruvoq, tunisammi annertussusaat taamaallaat 3 procentinik qaffariaateqarsimammata. Pingaartumillu raajartassiissutit ikilinerat tuniniaanermi akitigut qaffasinnerungaatsiartunik angusaqaataasimavoq.

Qaleralinnit angusat ilorraap tungaanut ingerlapput ilaatigut Upernavik Seafood A/S-imik 2014-imi oktobarip 1-ani tamakkiisumik piginnittuulernerup kinguneranik. Tamakkiisumilli piginnittuulernerup kinguneqarluaatissai ukiup affaata aappaani imaroriarpat aalisartoqarsinnaalerpallu aatsaat takussutissaqartitsilerumaarput.

Aalisakkanik natermiunik Koszalinimi Polenimiittumi tunisassiorneq siuariartortuarsinnarpoq suliffeqarfissuullu isertitaqarneranut ilapittuutaalluarluni.

Barentshavemi saarulliit qaqerlaat nerpiinik qerititanik aammalu misaqqarnanik ukiup affaani siullermi tuniniaaneq pisarnertut ingerlanneqanngilaq kilisaat Sisimiut amutsivimmi sivisujaamik amoqqasariaqarsimammat. Sisimiut-p aalisarnini apriilimi aallartippaa isertitassanilu ukiup 2014/2015-ip affaata aappaani piviusunngortissangatillugit.

Ukiumi isertitassat qaffasinnerulaartut

Naak Kalaallit Nunaata kitaata sineriaani sikuunera apriilimi maajimilu angusatigut kingunerlutsitsigaluartoq Royal Greenlandip ukiumoortumik isertitassai ukiumut 2013/2014-imut naleqqiullugit qaffasinnerulaassapput. Ingerlatsiviup annaasat imaroriarpat iluanaarutinngortissinnaassallugit ilimagaa.

Ukiup qiteqqunnerani nalunaarut 2014-2015 uani aajuk.

Asseq

 
 

Royal Greenland aperiguk

i
Write the text from the image