Nunani avannarlerni eqqusat aalisarneqarsinnaanersut misissuiffigineqarnerani suleqatigiissitami pilersinneqartumi Royal Greenlandimi Kalaallit Nunaanni tunisassiassanik inerisaanermik immikkoortortaqarfiani ingerlatsisuusoq Nikoline Ziemer suleqatigiissitami aqutsisut ilaattut toqqarneqarpoq. Suleqatigiissitaq "Urghin" -imik taaguuserneqartoq EU -mit 6,5 millioner koruuninik tapiiffigineqarpoq.

Tapiissuteqarneq EU-p aningaasaateqarfia Norhern and Arctic Peripheri programme (NPA ) aqqutigalugu pivoq. NPA nunani EU –ip killinganiittuni ineriartortitsinermut tunngasunik suliaqartunut aningaasaateqarfiuvoq. Suleqatigiissitami tapiissuteqarfigineqartumi ilaasut tassaapput nunani avannarlerni Islandimi, Norgemi, Irlandimi, Skotlandimi aammalu Kalaallit Nunaanni eqqusanik aalisarnermik tunngassuteqartunik suliaqartut. Suleqatigiissitaq Norgemi illoqarfimmi Tromsømi siullermeerluni ataatsimeeqqammerpoq.

- Ataatsimoorluta eqqusanik aalisarnermik aallartitsiniarnermi unammilligassat assigiinngitsut qulaajassavavut. Ilaatigut aalisarnermi periutsit, ingerlatsineq, pitsanngorsaaneq, ingerlasussanik piareersaaneq aammalu allaffissornikkut aqutsineq qanoq ingerlanneqarsinnaanersoq paasiniassavarput. Eqqusanik aalisarnermi misilittagarilersimasat avitseqatigiinneq aqqutigalugu ataatsimoorluta eqqusanik aalisarneq nutaajusoq qanoq susassaqartunut tamanut iluaqutissanngorluni pilersinneqarsinnaanersoq qulaajaaffigissavarput, Nikoline Ziemer oqarpoq.

Nikoline Ziemer biologiusoq upernaaq 2014 aallarnerfigalugu eqqusat nunatsinneersut qanoq aalisanerqarsinnaaneri, tunisassarineqarsinnaaneri aammalu avammut qanoq tuniniarneqarsinnaaneri misissuiffigaa. 2013-imi ataatsimeetsuartunut peqataanermini suleqateqarluni aningaasaateqarfinnut tapiissutinik qanoq qinnuteqartoqarsinnaanera ilitsersuunneqarsimavoq. NPA-mi ataatsimeeqateqarsimavoq kingornalu suleqatigiissitaq pilersinneqartoq upernaaq 2015-mi 6,5 millioner koruniinik tapiiffigineqarpoq.

Ataatsimiinneq siullleq

- Suleqatiggiissitami ataatsimiinneq siuplleq majip ulluisa 19-ianniit 21-ianut Norgemi Tromsømi pivoq. Tassani ataatsimiinermi ukiuni pingasuni aggersuni suleriusissarput sinaakkusersorneqarpoq. Suleqatigiinnissami suliassat assigiinngitsut qulequttat arfinillit aallavissatut siunnniunneqarput uangalu aqutsisoqatigiinni ilaavunga.

- Aqutsisoqatigiinni ilaalernera ukiumi kingullermi misilittagarilersimasakka iluaqutaassapput. Taamatuttaaq Royal Greenlandi suleqatigiinnermi pingaaruteqarpoq, uagummi suliassani assigiinngitsuni piareersaasiornerni nukiit pigereerpavut, sooorlu eqqusanik aalisarnermi, angallateqarneq aammalu tunisassiorfeqarneq eqqarsaatigalugit.

- Ataatsimiissitaliaq ukiumut marloriarluni naapittassaaq. Suliassaq siulleq tassaavoq eqqusat ukioq kaajallallugu pissusaannut tunngasunik misissuineq. Tamanna Pinngortitalerifffik peqatigalugu pissaaq, taakkumi nakkutilliisuummata.

Suleqatigiinnut ilaavortaaq ilisimasalik avataaneersoq, taanna Canadami eqqusat aalisarneqarnerannut tunngasunik aqutsisoqarfimmeersuuvoq.

- Eqqusanik aalisarneq canadami ingerlanneqareerpoq, taamaattumik ilisimasalik avataaneersoq canadameersoq atorneqassaaq. Eqqusanik aalisarnermi, aalisartunut aammalu avammut niuernermi inatsisinut tunngasut taassuma ilisimasai iluaqutiginiarneqassapput. Maannakkummi inatsisit atuuttut tunngavigalugit europami niuerfiit angujuminaapput, taamaattumik inatsisit qajassuartumik misissuifigalugit eqqusanik aalisarneq aallartinneqarsinnaavoq. Taamaattumik suliniarnissatsinni inatsisinut tunngasut unammilernartuupput, Nikoline Ziemer naggasiiluni oqarpoq.

Allattoq assiliisorlu: Inga Egede, ineg@royalgreenland.com

Asseq

 
 

Royal Greenland aperiguk

i
Write the text from the image