- Saarullinnik tarajorterisinnissamut akuersissummik pigatta, junip naanerani saarullinnik tunisineq aallartippat inuit 15-it sulisorilissavagut, Kangaatsiami tunisassiorfiup ingerlatsisua Abia Thorsteinsen aamma Kangatiap pigisaani nunaqarfinni tunisassiorfinnut akisussaasuusoq oqarpoq.

- Suluppaakkat, qeeqqat aammalu saarulliit qeritillugit tunisassiaraavut, kisiannili qerititsivik mikivallaarmat aammalu ullormut taamaallaat saarullliit tonsit marluk affarlu tikillugit qeritinneqarsinnaammata, inuussutissalerinermut oqartussaasunut saarullinnik tarajorterisinnaanissarput qinnuteqaatigigatsigu akuersissummik pivugut. Akuersissut pereeratsigu saarullinnik tunisineq aallartippat ullormut tonsit marluk pingasullu akornanni tarajorterlugit tunisassiarisinnaagatsigit saarullinniarnerup ingerlanerani pisassat nungunnissaasa tungaanut inuit 15-it tikillugit sulisorissavavut, Abia Thorsteinsen oqarpoq.

2013-imi Attumi aammalu Ikamiuni tunisassiorfiit Royal Greenlandimit ingerlanneqalerput, kingorna 2014-imi oktoberimi tunisassiorfinnut saarullinnik tunisisinnaaneq ammarneqarpoq. 2014-imi Attumi tunisassiorfimmut saarulliit 129 tons aammalu suluppaakkat qeeqqallu tonist qulit tunineqarput, taamatuttaaq nipisaat suaat tonsit qulit tunineqarlutik. Ukioq manna maannamut saarulliit tonsit arfineq pingasut aammalu nipisaat suaat tonsit 24-it tunisasssiorfimmut tunineqareerput..

- Attumi tunisassiorfik Royal Greenlandimit ingerlanneqaleramili ingerlallualeraluttuinnarsimavoq, maannalu saarullinnik tarajorterineq ingerlanneqassammat aalisartut aammalumi Royal Greenland ukioq manna isertitaqarluarumaartut neriutigaara, tunisassiorfiup pisortaa oqarpoq.

Pisisartut tikeraarput

Kangaatsip pigisaani nunaqarfinni Royal Greenlandip tunisassiorfii allat aamma tunisassiorluarput.Niaqornaarsummi saarullinnik tarajorterinerinnaq ingerlanneqarpoq. Tassani inuit 20-it sulisorineqarput. Saarulliit tarajortikkat 502 tons siorna tunisassiarineqarput ukioq mannalu saarulliit 245 tons tunisassiarineqareerlutik.

- Niaqornaarsummi tunisassiorneq ingerlalluarpoq. Spaniamiut tunisassianik pisisartut tikeraarnikuupput, taakkulu piumasaat naapertorlugu tunisassiornermi ineriartortitsineq ingerlanneqarpoq. Taammaattumik Niaqornaarsunni tunisassiornermi nutarterineq ingerlaavartumik pivoq, Abia Thorsteinsen oqarpoq.

Ikerasaarsummi nillataartitsivinnik ivertitsisoqarnikuuvoq, taamaattumik saarullinnik tarajorterineq aammat ingerlanneqassaaq.

2015-imi januarimiit Ikamiuni tunitsiviani qeritsitviup ulikkaarnissaata tungaanut saarulliit 46 tonsingajaat kiisalu qalerallit 27 tons sinnerlugit nipisaallu suaat tonsip arfinillit tunisassiarineqarput.

- Ukioru sikuppat Ikamiuni qerititsivik ulikaaqqissagaluarpat, saarullinnik tarajorterinissamut akuersissummik pinikuuvugut, Abia Thorsteinsen Kangaatsiap oqarpoq.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image