- Maannakkorpiaq aalisartut qaleralinniarnermi neqitassatut atugasssanik ammassannik 20 tonsinik tigooraaneq ingerlatileruttorparput. Ammassannik tunisineq sapaatip akunnerani uani ingerlanneqassaaq, Narsami Royal Greenlandip tunisassiorfimmi ingerlatsisoq Niels Sakariassen oqarpoq.

- Siorna maani aalisartut ammassannik tonsinik qulinik misliummik tunioraatippavut. Milisiliineq ingerlalluarmat aammalu aalisartut taakka neqitassat iluaqutigalugit kingusinnerusukkut qaleralinnik 200 tonsinik tunisimmata, ammassaat tunisat marloriaatinngorlugit ukioq manna tigooqqarniarparput, neriuutigigatsigu taakku neqitassat neqitaralugit qalerallit 400 tonsit tunineqarumaartut, Niels Sakariassen oqarpoq nangillunilu:

- Maani aalisartut tunisisartut 15-it 20-illu akornanni amerlassuseqartut eqeersimaartuupput sila atorsaatillugu aalisartuartartut. Taamaattumik aamma nipisaat suaat naatsorsuutigisatsinniit annertunerusut ukioq manna tunineqarput.

Nappartat amerlanerusut

Kujataani nipisaat suaannik tunisineq ukioq manna apriilip qulinganiit maajip 26-ianut pivoq.

- Ukioq manna nipisanniarnermi atugassarititaasut pitsaanerpaanngillat ukiuunerujussua aammalu sila pitsaannginnera pissutigalugu, kisiannili taamaakkaluartoq nipisaat suaat nappartat siornarniit amerlanerusut tunineqarput. Ukioq manna nappartat 160-it tunineqarput siorna nappartat 155-it tunineqartut. Tamanna naammagisimaarpara, aammami ukiut tallimat kinguliit nipisaat suaannik tunisisarneq qaffakkiartuinnarmat.

Narsami aalisakkanik tunitsivik ingerlaavartumik qaleralinnik saarullinnik suluppaakkanik unalu sapaatip akunnera aamma ammassannik tigooraavoq.

Tunisassiorfiup ingerlatsisua aamma oqarpoq Narsami tunisassiorfimmi saarullinnik panersiineq ingerlanneqalertussaasoq.

- Saarulliit panertut piumaneqarnerat annertummat tunisassiorneq malinnaasinnaaqqullugu saarullinnik panersiineq kujataani aamma ingerlanneqalernissaa Royal Greenlandip pilersaarutigaa. Tassalu suliassaq taanna Narsami tunisassiorfimmi ingerlanneqartussaavoq. Tamanna sulisunik aalajangersimasunik marlunnik suiassaqartitsissaaq, tunisassiorfiup ingerlatsisua naammagisimaartoq oqarpoq.

Soorlu siornatigut oqaluttuarereeripput Polar Seafoodip kilisaataataa Polar Aassik ingerlaavartumik aasap aammalu ukiap ingerlanerani Narsami Royal Greenlandip tunisassiorfanut saarullinnik tunisissaaq. Tamassuma nassatarisaanik Narsami tunisassiorfimmi sulisut arfiniliusut 15 –inut amerlineqartussaapput.

Allattoq: Inga Egede,ineg@royalgreenland.com

Assiliisoq: Niels Sakariassen

Asseq

 
 

Royal Greenland aperiguk

i
Write the text from the image