Ullumikkut juunip ulluisa 17-ianni Qaqertarsuarmi Royal Greenlandip tunisassiorfianut saarullinnik tunisineq ammarpoq. Qeqertarsuarmi aalisartut aalisariaaseq nutaajusoq atorlugu sukkanerusumik aalisakkanik pitsaassutsikkut pitsaasunik tunisisarnissaat isumalluarfigalugu Qeqertarsiuarmi Royal Greenlandip tunisassiorfiani sulisunut aqutsisoq Karl Julius Broberg oqarpoq.

- Qeqertarsuarmi aalisartut ilaasa siorna aalisariaaseq nutaaq atorlugu aalisaramik iluatitsilluarput. Taakku ningittakkat atorlugit imaani sikumilu aalisartarput. Amuartaatit aammalu akkersat atornagit, kisiannili ningittakkat atorlugit aalisarnermi aalisakkat amerlanerusut piffissaq sivikinnerusoq atorlugu pisarineqartarput. Ukioq manna aalisartut amerlanerusut ningittakkat atorlugit saarullinniarnissaat naatsorsuutigigakku ukioq manna saarullinnik tunisineq isumalluarfigaara, Karl Julius Broberg oqarpoq, nangipporlu:

- Nalinginnaasumik amuartaatit aammalu akkersat atorlugit aalisartut aalisartillutik akunnerit pingasut sisamallu aalisarnerminni saarulliit 100 kiilut missingi pisarisarpaat. Kisiannili ningittakkat atorlugit aalisartillutik qarsorsat atorneqartut qanoq amerlatiginersut apeqqutaalluni akunnerit marluk ingerlanerini saarulliit 150 kiilut aammalu 200 kiilut akornanni pisarisinnaasarpaat. Taamaattumik aalisariaaseq sunniuteqarluarpoq.

Pitsaassuseq

Saarulliit ningittakanik pisarineqarsimasut qassutinik pisarineqarsimasuniit pitsaassutsikkut pitsaanerusartut Karl Julius Broberg oqarpoq.

- Qassutit saarullinniarnermi atorneqarpianngillat, pisat igiinnartakkat amerlavallaartarmata. Pisanik igitsiinnartariaqartarneq pisarpoq saarulliit qassutinik pisarineqarsimasut nerpii aappilavallaartarmata. Pisalli amuartaatinik, akkersanik imaluunniit maanna aamma ningittakkanik pisarineqarsimasut nutarpasinnerusarput nerpiilu qaqqorissuusaramik akigissaarnerusarput.

- Aalisartut pitsaasumik pitsaassusilinnik saarullinnik tunisinissartik soqutigisarisarivaat, taamaattumik saarullinniarnermi ningittakkat atorneqartalerneri uagut naammagisimaarparput, naak ningittakkanik saarullinniarnissaq uagut piumasarinngikkaluarlutigu, Karl Julius Broberg nassuiaavoq.

Taassuma aamma naatsorsuutigilluinnarpaa ukioq manna saarullinniarnermi amerlanerusut ningittakkat atorlugit saarullinniartoqassasoq.

Qeqertarsuarmi tunisassiorfimmi saarulliit ullormut tonsit sisamat qeritinneqarsinnaapput. Siorna saarullinniarnermi 2013-imi oktoberimiit 2014-imi oktober tikillugu Qeqertarsuarmi tunisassiorfimmi saarulliit 136 tonsingajalluinnaat tunisassiarineqarput.

Qeqertarsuarmi umiatsiaararsorluni aalisartut 40-it 50-illu akornanni amerlassuseqartut affaasa missingi saarullinniarlutik aalisartarput sinneri qaleralinniarlutik aalisartut. Tunisassiorfimmi 30-it missaani sulisoqartumi saarullinnik tunisinerup ammannginnerani nipisaat suaat 68 tonsit tunisisaasiarineqarput.

Nunatsinni tunisassiassanik aammalu neqitassatut atugassanik ammassannik tunisasssiorfik aamma tunisassiorpoq. Taamatuttaaq saattussat tunisassiarineqarput, aasaaneranilu aalisariutit pingasut sisamalluunniit tunisisartussaapput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image