Paamiuni Arsummilu aalisartut ukioq manna nipisaat suaannik 165 tonsinik pisassinneqarput. Paamiuni aalisartut nipisaat suaat 73 tonsit tunivaat. Taamaakkaluartoq nipisaat suaat qerititat 60 tonsit ukioq manna tunisassiarineqartut Paamiuni tunisassiorfiup ingerlatsisuata naammagisimaarpai.

- Siullermeerluta tunisassiorfimmi maani nipisaat suaannik qerisunik tunisassiorneq aallullugu ingerlapparput. Tunisassiornermi malinnaasinnaasimavugut taamaattumik ukioq manna tunisassiarineqartut 60 tonsit uanga naammagisimaarpakka, Paamiuni tunisassiorfiup ingerlatsisua Ilannnguaq Abrahamsen oqarpoq

Nipisaat suai nutaajutillugit qerititat tunisassiarineqartut 100 gramminik, kiilumik ataatsimik aammalu 6, 2 kiilunik annertussuseqartunik poortukkat nunatsinni aammalu nunani allani pisisartunut maanna nassiunneqareersimalerput.

- Tonist pingasut missingi nunatsinni tunisassanngorlugit pisisartunut nassiunneqarput sinnerilu nunanut allanut nassiunneqarlutik, Ilannguaq Abrahamsen oqarpoq.

Nipisaat suaat imermik tarajulimmik saleriarlugit tunineqarnerminniit akunnerit 24-it qaangiutinnagit assigiinngitsunik angissusilinnut poortorlugit nutaajutillugit qeritillugit Paamiuni Royal Greenlandip tunisassiorfiani tunisassioriaaseq nutaajuvoq. Paamiuni tunisassiorfimmi nipisaat suaannik qerisunik nutaajutillugit qeritititsilluni tunisassiorneq siorna misiliutaasumik ingerlanneqarmat tonsit qulit tunisassiarineqarput.

Tunisineq annikinneruvoq

Paamiuni tunisassiorfimmut nipisaat suaannik tunisineq ukioq manna apriilip qulinganiit majip 29-ianut pivoq. Ukioq manna 73 tons tunineqartut 2014-imi 92 tonsit tunineqarsimapput.

- Ukiorlunnera aammalu nipisanniarfiup nalaani silarluttarnera pissutigalugu ukioq manna nipisaat suaat tunineqartut siornarniit annikinnerupput. Kisiannili aappaagu nipisaat suaannik qerititanik tunisassioqqissagatta aappaagu tunisassioqqilerutta iluaqutigisinnaasatsinnik maanna misilittagaqalerpgut, tunisassiorfiup ingerlatsisua oqarpoq.

Nipisaat suaannik suliaqarlutik inuit 20-it sulisorineqarsimasut junimi saarulliit nerpiinik tunisassiornermi suliaqartinneqalissapput. Paamiuni tunisassiorfimmi aamma qalerallit, saarulliit aammalu saattuat tunisassiarineqarmata aasaq manna inuit 90-init ikinnerunngitsut sulisorineqassapput.

Januarip aallaqqaataaniit saattuat pisassiissutaasut 1.000 tonsiusut saattuat 347 tonsit Paamiut tunisassiorfianut tunineqareersimalerput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image