- Aalisarnermut tunngasunik sammivilimmik procesteknikeritut ilinniarsinnaalernera uannut matunik ammaassaaq. Nuannaarutigeqaara uannut tulluuttumik maanna ilinniagaqarsinnaalerama. Taamattumik ilinnialernissannut piareeqqavunga, 23-inik ukiulik Frederik Kristiansen ukiut aappa qeqqa Paamiumi Royal Greenlandip aalisakkeriviani tulaassuivimmi suleqatigiiaani aqutsisutut sulisimisoq oqarpoq. Frederik Kristiansen Royal Greenlandimi sulisut inuusuttut qulingiluat allat peqatigalugit aalisarnermut tunngasunik sammivilimmik proceteknikerisut ilinnialissaaq.

Inuusuttut maanna ilinniagaqalernissaminnut periarfissinneqartut ilaat sineriammi Royal Greenlandip tunisassiorfiini ilinniagaqarsimanngitsutut sulisuupput aallalli kilisaatini inuttaallutik.

- Royal Greenlandimi sulisoqarnermut immikkoortortaqarfik, Inuili aammalu Ilinniartitaanermut Naalakkersuisoqarfik peqatigiillutik Royal Greenlandimi suleqataasut inuusuttut procesteknikeritut immikkut aalisarnermut tunngasunik sammivilimmik ilinniakkamik aallartitsisinnaanissaannut aqqutissiuisuupput. Inuusuttut procesteknikeritut ilinniakkaminnik naammassinnereernerminni Danmarkimi fiskeriteknologitut ilinniaqqinnissaminnut periarfissaqalissapput, Royal Greenlandimi sulisunut siunnersorti Adolf Egede oqarpoq.

Aalisarnermut tunngasunik ilinniartinneqassapput

Procesteknikeritut ilinniarneq ukiuni marlunni sivisussuseqartoq nalinginnaasumik suliffeqarfinni inuussutissalerinermut tunngassuteqartuni sulisinnaanermik piginnaaneqalerfiusarpoq. Ilinniarneq ilinniartut pisariaqartitaat aallaavigalugu Inuilimi naleqqussarneqartarpoq. Maannali Royal Greenlandimi sulisut qulingiluat ilinniartitsineq aalisarnermut tunngasunik sammiviligaasoq peqataaffigissavaat. Ukioq ataaseq atuareernermi fiskeriteknologitut ilinniakkamut sammisuinnavimmik ilinniarneq ingerlanneqassaaq, ilaatigut Holstebromi fiskeriteknologitut ilinniarfimmi ilinniartitsisut peqatigalugit ingerlanneqassaaq.

- Suliffiga nuannareqigakku aalisarnermut tunngassuteqartumik ilinniakkamik ilinniagaqarnissara kissatigaara. Procesteknikeritut ilinniarnera naammassigukku fiskeriteknologitut ilinniaqqikkusuppunga, Frederik Kristiansen Ilinniarnertuutut ilinniagaqareersimasoq oqarpoq.

- Maanna tunisassiornermut tunngassuteqartunik ilinniartoqarsinnaalernera aammalu ilinniagaqartut kingorna aqutsisutut inerisarnerisigut Royal Greenlandip tunisassiorfiiini tunisassiornermi aqutsineneq eqqarsaatigalugu oqalisaataassaaq. Taammaattumik maanna aalisarnermut tunngassuteqartunik sammiveqartumik ilinniarneq ingerlanneqarsinnaalermat oqiliallannarpoq. Kiisami suleqataasut amerlanerusut ilinniagaqarsinnaalerput, Adolf Egede oqarpoq.

Royal Greenlandimi imarsiornermut tunngasunik aammalu nunami tunisassiorfinni ilinniagaqartut maanna 27-iupput. Aggustusimiit procesteknikerisut ilinniartut aallartippata Royal Greenlandip suliffeqarfiutaani ilinniartut katillutik 36-inngussapput.

Allattoq: Inga Egede

Assit: RG

Asseq

 
 

Royal Greenland aperiguk

i
Write the text from the image