Kalaallit Nunaata imartaani nungusaataanngitsumik nipisanniartoqartarnera takussutissaqartikkumallugu MSC-ip ilisarnaaqqutaanik ilisarnaaqquserneqartalernissaa anguniarneqarmat ukioq mannamiit atuutilersumik nipisanniarluni aalisarnermi tunisinermiulu periutsit allanngortinneqarput. Allannguutit ilagaat sumiiffinni assigiinngitsuni nipisanniarfiit arfinilinnut immikoortiterneqarneri, sumiiffinni tamani ullut aalisarfiusussat ullunut 47-inut killilerneqarat kiisalu pisassat katillugit 1500 tonsiusut sumiiffinni assigiinngutsuni aalisarneqarsinnaasunngorlugit agguataarneqarneri.

-Maannamut nipisanniarnermi malittarisassat allanngortinneqarsimaneri maluginngilarput, taamaattorli uagutsinnut aalisartunullu allaffissornikkut suliassaqarnerulernerput malunnarpoq. Uagut Arsummiullu aalisarfitsinni nipisaat suaat 165 tonsit pisarisinnavavut. Siorna 2014-imi katillugit 92 tonsit tunineqarmata maannamullu 27 tonsit tunisassiarigatsigit siornarniit amerlanerusunik tunisisoqarnissaa naatsorsuutginngilara, Ilannguaq Abrahamsen oqarpoq.

Nipisaat suaasa MSC-imik ilisarnaaqquserneqartalernissaat anguniarlugu malittarisassat nutaat malillugit aalisarfiusumi pisassat pisarineqanngitsoortut aalisarfiusumut tullermut pisassatut ingerlateqqinneqarsinnaapput. Tassa imaappoq Paamiuni Arsummilu pisassatik nungunngippatigit, taava pisassat sinneruttut aalisarfiusumut Nuummut ingerlateqinneqarsinnapput. Nuummi pisassat 522 tonsiupput.

Ukioq mannamiit Royal Greenlandip Maniitsumi tunisassiorfiani aamma nipisaat suaasa suliarineqartarneri allanngortinneqarpoq, siornatigut nipisaat suaat saleqqaarlugit nappartanut poortoriarlugit nassiunneqartarsimasut maanna salinneqaqqaaratik ameraqartiinnarlugit poortorneqarlutik nassiunneqartassagamik.

Allattoq: Inga Egede,ineg@royalgreenland.com

Assit: Tobias Tobiassen


Asseq

 
 

Royal Greenland aperiguk

i
Write the text from the image