Royal Greenlandip saarulliit nerpiinik tunisassiornermi atortui Kangaatsiami ullumi ataatsimik ilaneqarput. Taamaasilluni tunisassiorfik tunisassiornivimmik aallussilerpoq. Tunisassiorfik siornatigut ulapinnerpaaffimmi 30-nik sulisoqarluni aalisakkanik qerititsineq taamaallaat ingerlatarisimavaa.

- 30-nik sulisoqarluta aallartisanerput pikkunaqaaq. Sulisugut sapaatip akunnerata tulliani ullukkkut unnuakkullu sulisartussanut avinniarpagut, suleqatigiillu affai sulilersussanik nutaanik ilinniartitsissapput. Tunisassiornerpullu ingerlallualeriarpat saarulleqarnerup nalaani 55-t tungaannut sulisorisinnaassavagut, tunisassiorfimmi ingerlatsisoq Abia Thorsteinsen oqaluttuarpoq.

Royal Greenlandi maannamut Paamiuni Maniitsumilu saarulliit nerpiinik tunisassiorfeqarpoq, Sisimiuni taamatut tunisassioriaaseq ukioq manna juulimi aallartinneqassaaq.

Paamiuni misilittakkat atorluarneqarput, tappiorannartulerinermi aqutsisoq Paulini Broberg aamma teknikkeqarnermut akisussaasoq Jens Gabrielsen ullumi makkunani Kangaatsiamiipput suleqatitik saarulliit nerpiinik Europami tuniniagassanik tunisassiornermi ilinniartikkiartorlugit.

Kangaatsiap tunisassiorfiani qerinasuartitsivik nutaaq aalisakkanik angisuunik, soorlu qeeqqanik allanillu qerinasuartitsisartussaq atuutilerpat tunisassiorfimmi tunisassiorneq suli sukataartitsinerulissaaq.

- Neriuppunga qerinasuartitsiviit ikkussuunneqarneri qaammatip uuma naanerani naammassineqarumaartut. Qerinasuartitsiviup atuutilersinneqarneragut ulloq unnuarlu 25 tonsinik tunisassiorsinnaalissaagut, tassa siornamut naleqqiullugu 13-tonsinik qaffariaatilimmik, Abia Thorsteinsen oqarpoq.

Tunisassiorfik ippassaq tikillugu ulapinnerpaaffiup nalaani 15-inik sulisoqarsimavoq aalisakkanik assigiinngitsunik kipparissukkaanngortitsilluni qerititsinermik suliaqartunik. Saarulliit nerpiinik tunisassiorfiup qerinasuartitsiviullu atuutilernerisigut tunisassiorfik silamik akornuteqartigani ukioq kaajallallugu 50-nik sulisoqarsinnaalissaaq.

Kangaatsiami umiatsiaararsortut 60-t tungaannut amerlassusillit tunisassiorfimmut tulaassuisartuupput. Amerlanerit nipisat suaannik tulaassuipput, suaallu juunip naalernerani tunisaajunnaarnissaasa tungaannut ingerlassallutik. Umiatsiaararsortut pingasuinnaagallartut maannamut saarullinnik tunisassiorfimmut tulaassuisuupput.

Allattoq: Káte Hansen, kaha@royalgreenland.com

Assit: RG

Asseq

 
 

Royal Greenland aperiguk

i
Write the text from the image