- Tunisassiarineqarsinnaasunik peqarluarpoq piumaneqarluarpullu, maannali apeqqutaaginnalerpoq tunisassiarineqarsinnaasup tunisassiarineqarnera imminut akilersinnaanersoq paasissallugu, taama oqarpoq uumassusilerisoq Nikoline Ziemer, Royal Greenlandimi immikoortortami nutaami Kalaallit Nunaanni tunisassiassanik inerisaanermik immikkoortortaqarfiani ingerlatsisuusoq.

- Suliaq nutaarluinnaavoq aamma suli misissuineq ingerlanneqarpoq, nassuiaavoq.

Upernaaq 2014-imili Nikoline Ziemer eqqusat mamarluinnartuusut sumiiffiinut ornigulluni misissuisarpoq. Tunisassiaq taanna Japanimi piumaneqarluinnartuuvoq, kisiannili aamma Europami USA-milu tuniniarneqarpoq. Eqqusap suai gonadedinik taaneqartartut nerineqartarput

- Pisisartup tunisassiaq nutaajutillugu piumammagu, taamattumik paasiniarparput qeritillugu imaluunniit allatut ilillugu nutaajunerpaajutillugu tunisassiarisinnaanerlugu misissuiffigaarpoq. Tassalu misissuinera tassunga maanna killippoq, Nikoline Ziemer oqaluttuarpoq.

Aalisariaatsit

Eqqusat nuna sinerlugu immami 50-70-miiterisut ititigisumi uumasuupput, taamaattumik eqqusanik aalisarneq sinerissap qanittuani taamaallaat ingerlanneqarsinnaavoq.

Nikoline Ziemer eqqusat sumiiffiinut ornigulluni qanoq aalisarneqarsinnaanerat misileraaffigaa.

- Eqqusat sumiiffiinut ornigulunga 2014-imi Maniitsup eqqaani aalisariaatsinik misileraasimavunga, taamatuttaaq Nuup eqqaani. Immami pullatinik ilioqqaanikkut eqqusat pisarineqarsinnaapput, kisiannili uanga aalisariutsit allaanerit misilerarsimavakka, immap naqqani kiliortuisinnaasunik qassutitalinnik atortoqarlunga misileraavunga. Taakku sarfaqarfiulluartumi immap naqqani miiterit arfineq marluk 25-illu akornani itissisuseqartumut ningittarpavut taannalu atortorissaarut immap naqqani ingerlaartillugu eqqusat pisarisarlutigik, Nikoline Ziemer oqaluttuarpoq.

Nikoline Ziemerili eqqusat qanoq tunisassiarineqarsinnaanerinik misissuinermini alloriaqqippoq, eqqusat pisarisani Royal Greenlandip tunisassiorfiata laboratoriaani qeritillugit imaluunniit tarajorterlugit imaluunniit allatut suliaralugit pitsaassusermik pissaanerpaamik tunisassiarineqarsinnaaneri misissiuffigileramiuk.

- Tunisassiassaq pisisartumut apuukkuni qaffasissumik pitsaassuseqassaaq, taamaattumik eqqusap tunisassiarineqarsinnaanerat misissuiffiginerani killiffik pissanganarluinnartoq killeqqavarput, Nikoline Ziemer oqarpoq.

Eqqusalli tunisassiarineqarsinnaanerisa aammalu niuerfiusinnaasunik Nikoline Ziemerip misissuinera eqqusat tunisassiarineqarsinnaanissaannut kisimi aalajangiisuunngilaq. Eqqusanik aalisarneq Uillut pillugit nalunaarutip ataani inissisimavoq, taannalu nalunaarut allanngortinneqanngippat eqqusanik aalisarneq tunisassiornerlu akisoorujussuanngorsinnaavoq.

- Uillut pillugit nalunaarut malillugu immami aalisarfigineqartussap qanoq inneranik misissugassanik tigusiffigineqarnissaanik aammalu pisanik misissugassanik nassiussinissaq aalisalinnnginnermi piumasaqaataavoq. Misissuineq taamaattoq 1.000 euro-nik akeqarmat eqqusanik aalisarneq akilersinnaangilaq. Taamaattumik eqqusanik aalisarneq tunisassiornerlu akilersinnaassappat nalunaarut allanngortittariaqarpoq, Nikoline Ziemer oqarpoq.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image