Nunaqarfinnguami 113-inik inulimmi tunisassiorfik Arctic Green Food-ip ingerlatarisimasaa 2004-mili matoqqasimasoq novemberimi Royal Greenlandimit ingerlanneqalerluni ammaqqippoq.

Assaannarmik amoorippput

Tunisassiornerlu ingerlalluarpoq. Tunisassiorfiup ammarneraniit qaammatit siulliit aalisartut saarullinnik 2,5 tonsinik tunioraasimapput. Kingorna qaleraliit tunineqalerput maannamullu 32 tonsit aalisartunit qulit missaaniittunit tunineqarsimapput. Aalisartup ataatsip ullormut qalerallit 350 kilo tikillugit sila ajunngitsillugu pisarisinnaasarpaa. Qalerallit ningittakkanik pisarineqartartut assaannarmik amoorneqartarput.

- Aalisartut marluinnalluta benziinatortunik amooruteqarpugut. Aalisartut tamarmik benziinatortunik amooruteqartuuppata pisarisartakkat annertunerusinnaagaluarput. Aalisartut inuusuttut akissaqalerunik benzinatortunik atortorisssaaruteqarlernissartik siunniussaraat, Hans Levisen oqaluttuarpoq, nangipporlu:

- Siornatigut puisip amiinik tunisilluta taamaallaat isertitaqartarsimavugut. Taamaattumik ukiorpassuarni aningaasatigut inissisimanerlussimavugut ilaatigut akiligassatigut kinguaattooqqasarluta. Maanna tamatta, aamma Pilersuisup aningasaatigut siuariartorneq malugaarput. Inuusuttut siornatigut ikiorsiissutinik pisartagaqarsimasut maanna aalisarnikkut namminneq pilersorsinnaalersut aammalu siunissagissaartut takullugit nuanneqaaq, Hans Levisen oqarpoq.

64-inik ukiulik Hans Levisen ukiuni 30-ini KNAPP-mi siulittaasuusimasoq oqarpoq naammagittarlutik tunisassiorfiup ammaqqinnissaa sulissutigisimallugu.

- Ilaatigut oqartoqartarpoq tunisassiorfiup ammaqqinnissaa anguniarlugu nipaappallaarlutalu naammagittarpallaarsimasugut, kisiannili ammaqqinnissaa anguniarlugu nipaatsumik sorsuuteqarsimavugut. Aap, nipituuliorluta suaartanngilagut, kisiannili siulitta ileqquattut nipaatsumik anguniagarput anguniarsimavarput, maannalu anguniagarput angugatsigu nuannaarutigeqaarput, Hans Levisen naggasiivoq.

Allattoq: Inga Egede, ineg@royalgreenland.com

Asseq: Nammineq pigisaq

Asseq

 
 

Royal Greenland aperiguk

i
Write the text from the image