Ajutoorneq Tunup imartaani arfininngormat ullaassakkut aalisarnermi pivoq.

- Silarluttumi aalisartoqarnerani ajutoortoqarpoq. Wire-ri sarrimmat angutit pingasut eqqorneqarput, taakkunani ataaseq kilisaatip sinaanut tammigussaareerluni niaqqumigut innarlerpoq, Royal Greenlandimi ingerlatsinermi tunisassiornermilu ingerlatsisoq Samal J. Olsen oqarpoq.

- Royal Greenlandip kilisaataataanni malittarisassani isumannaallisaanermut tunngasuni piumasaqaatit malillugit angut niaqorortinnaveeqquteqarpoq, niaqorortinnaveeqquteqarninilu pissutigalu innarlernera annertunerunngilaq. Angutit allat marluk vaajarimit aamma eqqorneqartut innarlinngillat, annilaarujussuarlutilli, Samal J. Olsen oqarpoq.

Angut 29-nik ukiulik silarlunnera pissutigalugu qulimiguulimmik aaneqarsinnaasimanngimmat Qaqqatsiaq Islandip tungaanut sapinngisamik sukkanerpaamik ingerlaarsimavoq.

Sapaatiummat ullaagaa qulimiguulik nakorsamik ilaasoqarluni tikippoq. Tikereernerata kingorna nalunaaquttap-akunnera qaangiummat angut 29-nik ukiulik amoorneqarluni qulimiguulimmut ikineqariarluni Reykjavikimi napparsimmaviliaanneqarpoq.

- Angut innarlertoq massakkut ajunngilaq, arnaataatalu Reykjavikimi napparsimmavimmi massakkut najorpaa, Samal J. Olsen oqarpoq.

Ajornartoorfik anigorniarlugu ataatsimiittoqarpoq

Samal J. Olsenip oqaatigaa, ajutoortoqareernerata kingorna ajornartoorfik anigorniarlugu Qaqqatsiami ataatsimiittoqarsimasoq.

- Ajutoortoqaraangat ajornartoorfik anigorniarlugu inuttat peqatigalugit ileqquusumik ataatsimiittoqartarpoq, pisorlu pillugu paasissutissat tamarmik Qaqqatsiami ataatsimiinnermi nalunaarutigineqarlutillu nalilersorneqarput, Samal J. Olsen oqarpoq.

- Nalilersuinermit paasineqarpoq, ajutoortoqarnerani inuttat suleqataasut tamarmik suliassatik eqqortumik suliarisimagaat silarlunneralu pissutigalugu ajutoortoqartoq.

Angutip 29-nik ukiullip timmisartumik angerlaanneqarnissaanut atatillugu qanoq issusaa aarlerinarunnaartutut nakorsanit nalilerneqariarpat nunatsinnukaanneqarumaarpoq.

Qaqqatsiaq Reykjavikip umiarsualiviani tulassimavoq, Qaqqatsiamilu aaqqissugassat annertunngitsut suliarineqareerpata raajarniarneq Svalbardip eqqaani nanginneqassaaq.

Allattoq: Inga Egede, ineg@royal Greenland

Assimik piginnittoq: RG

Asseq

 
 

Royal Greenland aperiguk

i
Write the text from the image