Tunisassiornerup tungaatigut pitsaassutsimik tunisassiorluarsinnaanermillu qulakkeerinnikkumalluta inuusuttunik kilisaatini nunamilu suliffinni sulisinnaasunik ilinniagaqartitsinissaq iliuusissatut pilersaarummi anguniarneqarpoq.

- Siunissaq ungasinnerusoq eqqarsaatigalugu kilisaatit nunamilu suliffiit ilinniarsimasunik inuussutissarsiutigalugulu aalisarnermik ingerlatsinermi sulisinnaasunik inuttaqarnissaat/sulisoqarnissaat iliuusissatut pilersaarummi anguniagaavoq, Royal Greenlandimi inuttalerinermi ataqatigiissaarisoq Mika Heilmann oqarpoq.

Inuusuttullu arlallit kilisaatini Royal Greenlandimit pigineqartuni ilinniakkamik aallartitsereerput.

- Aalisartutta ilaat angallammi naalakkatut apriilimi allagartartaassaaq, inuttallu allat qulingiluat angallammi naalakkatut ilinniagaqarnissaminnut nalunaaquttap-akunneri aalajangersimasut atorlugit umiartorsimanissamut piumasaqaataasoq eqquutsikkumallugu Royal Greenlandip kilisaataataanni inuttaapput. Inuusuttut 18-it Holstebromi fiskeriteknologitut aggustimi ilinniartunngussapput. Taakkunani qulit kilisaatini inuttaapput sisamallu kilisaatini Royal Greenlandimit pigineqartuni mistalitut ilinniartuupput.

- Kilisaatini aqumiussanik ilinniagaqartitsinissaq Royal Greenlandip pingaartippaa, tamatumanimi ilinniagaq tunisassiornermut tunngasoq soorlu fiskeriteknologitut ilinniagaq tunisassiornerup tungaatigut pitsaassutsimut tunisassiorluarsinnaanermullu pingaaruteqarmat.

- Taamatuttaaq massakkut aqumiut ukiuisa agguaqatigiisinnerat qaffakkiartornerata eqqumaffigineqarnissaa pingaaruteqarpoq. Tamannalu pissutigalugu massakkut aqumiut kingoraartissaannik inuusuttunik ilinniagaqartitserusuppugut, Mika Heilmann oqarpoq.

Ilinniartussarsiorneq

Royal Greenland inuusuttunik inuussutissarsiutigalugu aalisarnermik ilinniagaqarusuttunik ilinniartussarsiorniarluni suliffeqarfimmi ilinniarfiusinnaasuni ilinniagaqarineqarsinnaasunik ussassaaraluni suliffeqarfiit ilinniarfeqarfiillu ussassaarineranni peqataasarpoq.

- Ilinniarnertuunngorniarlutik GU-mi HTX-imilu ilinniartut saaffigaavut, tamatumanimi fiskeriteknologitut, mistalitut angallamiluunniit naalakkatut ilinniakkamik aallartitsinermi ilinniagaqarluarsimanissaq iluaqutaasinnaammat. Inuusuttunilli imarsiornermik tunngaviusumik ilinniagaqarsimasunik aamma ilinniartussarsiortarpugut.

Mika Heilmannip oqaatigaa, Royal Greenland Imarsiornermillu Ilinniarfik suleqatigiilluartut.

- Imarsiornermik Ilinniarfik Nuummiittoq inuusuttunik nunatsinneersunik imarsiornermik ilinniartoqarnissaminut sulilluarpoq. Imarsiornermik Ilinniarfimmik suleqateqarnerput pitsaavoq ilinniarfiullu ineriartornera malinnaavigaarput. Maluginiarparputtaaq inuussutissarsiutigalugu aalisarnermi aqumiutut ilinniakkap soqutigineqarnera ukiuni kingullerni annertusiartortoq. Aalisarnerlu nunatsinni inuussutissarsiutini pingaarnersaammat neriuppugut ineriartorluarneq atuuttoq ingerlaannassasoq, Mika Heilmann naggasiivoq.

Kilisaatini Royal Greenlandimit pigineqartuni ilinniakkamik maanna ingerlataqartut saniatigut inuussuttut 22-t Royal Greenlandip nunami suliffeqarfiutaani ilinniakkamik ingerlataqaleruttorput.

Allattoq: Inga Egede, ineg@royalgreenland@com

Assit: RG

Asseq

 
 

Royal Greenland aperiguk

i
Write the text from the image