22-inik ukiulik Riikke Jensen aammalu illooraa 21-inik ukiulik Arnaq Jensen aningaasanik tapiissuteqarfigineqarnermikkut angalanertik qaammatini marlunni sivisussuseqartoq piviusunngortissinnaasimavaat. Angalanerat suliniaqatigiiffik Saveaheart.dk aqqutigalugu piviusunngortinneqarpoq.

- Nuani allani kultuuri aammalu nunani allani meeqqanik sullisserusunnerput aallaavigalugu suliniaqatigiiffik Saveaheart.dk aqqutigalugu maanna nammineq piumassuserput aallaavigalugu Cuzco-mi meeqqat pitsuut sullippagut, Riikke Jensen oqarpoq.

Nammineq piumassuseq aallaavigalugu sulineq

Arnat inuusuttut marluk GU-mi ilinniakkaminnik naammassinnereerlutik sunngiffeqarallarnerminni januarinp ulluisa 28-iani Saqqamiit aallaramik februaarip aallaqqaataani Cuzco-mut 300.000-it sinnerlugu inulimmut apuupput.

Arnat inuusuttut marluk Cuzco-miinnerminni spanskisut ilikkarluarumallutik immikkoorlutik suliffeqarput. Angajoqqaarsiaqarput aamma inuusuttut nunani allaneersut namminneq piumassusertik aallaavigalugu sulisut peqatigalugit sulipput.

- Sapaatit akunnerit siulliit marluk spanskisut ilinniartinneqarpugut. Kingorna uanga ulloq unnuarlu meeqqat angerlarsimaffianni maannalu meeqqat sunngiffimmi ornittagaanni sulivunga, Riikke Jensen oqaluttuarpoq.

- Meeqqat inunnit takornartanit sullinneqarnertik sungiusimarpasippaat. Suli spanskisut pikkorissinnginnama ussersorluta meeqqallu attaveqatigiittarpugut.

Arnaq Jensen meeqqat sunngiffimmi ornittagaanni sapaatit akunnerit pingasut sulereerluni maanna meeqqerivimmi sulivoq.

-Meeqqat asannittuupput qanilaartullutillu, Arnaq Jensen oqarpoq.

Arnat inuusuttut takornariat ornigartagaannut illoqarfimmut nunap inoqqaavisa 1400 –ikkunni sanaartorsimasaannut aammalu nunarsuarmi kingornussassat pillugit UNESCO-p allattugaataaniittumut Machu Picchu- mut 2.057 miiterinik qutsitigisumiittumut takornariarnissaminnut periarfissaqarsimapput.

- Misigisaqarfioqisumik Machu Picchu-mut angalaarpugut. Ajoraluartumik illoorara napparsimaleraluarami napparsimavimmilu uninngalluni, taamaattumik sissamut allanullu takornariartarfinnut suli angalaarsinnaasimanngilagut. Kisiannili peqqisseqqereermat aprilimi angerlarluta aallartinnata angalaarnissatsinnut periarfissaqarpugut.

Riikke Jensenip aammalu Arnaq Jensenip Amerika kujallermut angalanerannut Royal Greenland aningaasaleeqataavoq.

Allattoq: Inga Egede, ineg@royalgreenland.com

Assit: Riikke Jensen, Arnaq Jensen

Asseq

 
 

Royal Greenland aperiguk

i
Write the text from the image