- Canadaliarpunga tuluit oqaasii ilinniariartorlugit nalunnginnakku kingusinnerusukkut ilinniaqqinninni tuluit oqaasii atornissaat atorfissaqartikkumaarlugit. Vancouverimi nunani allamiut peqatigalugit tuluit oqaasiinik ilinniartitsiffiusumi atuarfimmi atuarpunga. Atuarfimmi atuartitsineq uagut piginnaasavut aallaavigalugit ilinniartitsineq ingerlanneqartoq ullormut akunnerit arfinillit arfineq marlulluunnit malinnaavigisarpara. Ullut tamaasa ilikkagaqartarpunga, Nivi Olsen Silasen oqaluttuarpoq.

Nivi Vancouverimiinnermini angajoqqaarsiaqarpoq, taakku pingasunik ukiulimmik aammalu 16-inik ukiulimmik meeraqarput. Nivip angajoqqaarsiai inuusuttunik marlunnik Tysklandimeersumik Mexicomeersumillu aamma najugaqartitaqarput.

- Angajoqqaarsianni najugaqarnera nuannareqaara, aamma inuusuttunik aallanik marlunnik najugaqateqarama. Nuanneqaaq inuusuuttunik allanik nunani allaneersunik najugaqateqarluni. Sutigut tamatigut ikioqatigiittarpugut aamma ilinniagassatsinnik. Igaqatigiittarpugut Vancouverimilu illoqarfimmi nuanneqisumi takornariaqatigiillutalu pisiniarfilereqatigiittarpugut Nivi oqaluttuarpoq nangippporlu:

- Vancouverimi najugaqarluni pissanganarluinnarpoq. Illoqarfik qaqqartuujuvoq kusanarlunilu. Inuit inussiarneqaat ikiuukkumatuujullutik ataqqinnittuullutillu. Imminnut ataqeqatigiinnerat maluginiarpara allammi inuit bussiniit niuleraangamik qujasarput, Nivi Olsen Silasen oqaluttuarpoq.

Neriuutigisat

Nivi Olsen Silasenip Vancouverimut angalanini najugaqarninilu nammineq akilerpai.

- Angajoqqaama inunngoramali aningaasanik ileqqaarissullunga katersarisaat 18-inik ukioqalerama tiguakka, saniatigullu aamma angalanissannut Royal Greenlandimit taperneqarlunga. Taamaattumik maani Vancouverimiinnera aammalu kingusinneruskkut Los Angeles-iliarnissara imminut piumasaqarfiginermik nassataqarpoq. Tuluit oqaasii ilikkarniarpakka ilikkakkakkalu kingusinnerusukkut ilinniarnissanni atorniarpakka. Minnerunngitsumik neriuutigaara nunami allami najugaqarnera imminut akisussaaffigalunga inuuneqalernissannut ilinniarfigissallugu, Nivi oqarpoq nangillunilu:

- Siullermeerlunga angajoqqaakka ilaginagit juullisiussaanga. Uangali nammineerlunga angalanissara toqqagarigakku aalajangernikuuvunga maani juulli nuannersumik misigisaqarfiginiarlugu. Inuttummi ilinniarfigissagakku, Nivi Olsen Silasen oqarpoq imalu inuusuttoqatini kajumissaarlugit:

-Nunanut allanut oqaatsinik ilinniariartorlutik aammalu misigisassarsiorlutik angalanissaannik inuusuttoqatikka kajumissaarusuppakka. Allat oqaasiinik ilinniarneq nuanneqaaq aamma imminut akisussaaffiginissamut ilinniarfiuvoq, Nivi Olsen Silasen oqarpoq.

Allattoq: Inga Egede, ineg@royalgreenland.com

Assit: Nivi Olsen Silasen

Asseq

 
 

Royal Greenland aperiguk

i
Write the text from the image