Kangaatsiami tunisassiorfimmi quersuaq qerititsiviutigisoq sisamanngormat ulikkaarmat tunisassianik tigooraaneq unitsinneqartariaqarsimavoq sulisullu qulit angerlartinnaartariaqarsimallutik. Ipassaq ataasinngornermi tunisineq ammaqqippoq sulisullu sulileqqillutik. Maannali quersuaq qeritsisviutigisoq ulikkaaqqilereermat sulisut angerlarteqqinneqaratarsinnaapput.

- Royal Arctic Linep umiarsaa assartuisoq sapaatiummat tikippoq. Palitsit 100-it umiarsuarmik assartorneqarnissaat anguniarlugu inissamik inniminneereeraluartugut umiarsuup palitsit 63-it kisiisa inissaqartissimavai. Quersuaq qeritsitiviutigisoq palitsinik 100-inik imaqarluni ulikkaarmat palitsillu 63-iinnaat umiarsuami assartuisumi inissaqartinneqqarmata maanna tunisineq ingerlaqqilernerani palitsit 80-iniit amerlanerusut quersuarmi qerititsiviutigisi inissinneqareermata ajoraluartumik tunisineq matoqqeriaannaavarput, Kangaatsiami tunisassiorfiup ingerlatsisua Abia Thorsteinsen oqarpoq.

Kangaatsiani imissaaleqineqisoqarnera pissutigalugu tunisassiorfimmi saarulliit nerpiinik tunisassiorneq oktoberip qulingiluaani unitsinneqarpoq. Taamani sulisut 20-it angerlartiinnarneqarput sulisut 15-it suliinnartut. Sulisut taakku ilaat qulit sapaatip akunnerani kingullermi angerlartiinnarneqartut ulluni tulliuttuni angerlarteqqinneqaratarsinnaapput.

- Pilersaarutit malillugit novemberip arferngani umiarsuaqartussaavoq, kisiannili ilisimanngilara umiarsuaq tunisassianik qanoq annertutigisunik assartuisinnaajumaarnersoq aammalu ulluni tulliuttuni silap qanoq innissaa apeqqutaammat tunisineq matusariaqarumaarneripput sulisunillu angerlartitsisariaqarumaarnersugut oqaatigiuminaappoq, taamaaratarsinnaavorli, Abia Thorsteinsen oqarpoq.

Royal Greenlandip nunaqarfinni tassa Niaoqornaarsunni, Ikerasaarsunni Attumilu tunisassiorfiini quersuit qerititsiviutigisut ulikkaalermata nunaqarfinni taakkunani tunisassianik inissaqartitsinnginneq aamma ajornartorsiutaavoq.

- Royal Arctic Linep nunaqarfinni assartuutai umiarsuit inissaqartitsinerat killeqarpoq taamaattumik quersuit qeritsitiviutigisut tamakkiisumik imaarneq ajormata nunqarfinni tunisassiorfinni inissaasuatitsineq ajornartorsiutaavoq uteqattaartoq, Abia Thorsteinsen oqarpoq.

Nukissiorfiit Kangaatsiami imermik ajornartorsiuteqarneq iluarsingajalerlugu nalunaarutiginikuuaat.

Allattoq: Inga Egede, ineg@royalgreenland.com

Asseq: RG

Asseq

 
 

Royal Greenland aperiguk

i
Write the text from the image