- Ukiuni kingulliunerusuni qalerallit tunisassiat annikinnerulernikuugaluartut taamattoq ullormut tonsit arfineq pingasut ilaannili annikinnerusut tunisassiarisarpavut. Maannakorpiaq sulisut 15-it sulisoraavut, Qeqertami Royal Greenlandip tunisasiorfiani ingerlatsisoq Jakob Broberg oqaluttuarpoq.

Qalerallit iluitsuutillugit amerlanerilli niaquerlugit paperuerlugillu tunisassiorfimmi tunisassiaraat, sikugaangalli saarullinnik annikitsunik aamma tunisassiortarput. Jakob Brober oqarpoq ukiuni kingulliunerusuni tunisassiassat tunineqartartut annikinnerulernikuugaluartut taamaattoq sulisut 15-it qaammataani qulingiluani suliassaqartinneqartartut.

- Ukiuni kingullerni tunitsiviliisarnerit aammalu namminersortut tunitsiveqalernerat pissutigalugu allaneersut tunisisarnerat annikillinikuugaluartoq taamaattoq ukioq naallugu tunisassiortarpugut. Sikugaangat suliassakilligaangat qaammatini pingasuni sulisut ikilisarpavut.

Pitsaassusilerinermi nakkutilliineq annertusivoq

Qeqertami tunisassiorfik Kangaamiut Seafood A/S-imit ingerlanneqarnikuusoq 2014-imi Royal Greenland A/S-ip ingerlatarilerpaa. 2014-imi tunisassiorfik qaleralinnik 1129 tonsinik tunisassiorpoq .

Jakob Broberg oqarpoq tunisasssiorfik Royal Greenlandimit ingerlanneqalermat pappialarsorneq annertunerusoq ingerlanneqalersoq.

- Tunisassiorfik Royal Greenlandimit ingerlanneqalermat tunisassianik pitsaassusilerinermi nakkutilliineq annertunerusoq ingerlanneqalerpoq. Avammut tunisassiorneq pissutigalugu pitsaassuseq qaffasissoq anguniarneqarmat pappiararsornerulernerput annertunerusumik ajoriffaqartinngilara. Pitsaassusilerinermi nakkutilliisoq peqatigalugu pappialarsorneq ingerlataraarput. Tunisassiorfiup Royal Greenlandimit ingerlanneqalernerata kingorna ajorseriaatinik tikkuagassaqanngilanga, taamaallaalli Royal Greenlandimi sulisunut pikkorissarnissamut neqeroorutit sulisutsinnut aamma neqeroorutigineqartarnissaat kissaatiginartippara, Jakob Broberg oqarpoq.

Nunaqarfik Qeqertaq Ilulissat avannarpassuaniittoq 113-inik inoqarpoq.

Allattoq: Inga Egede, ineg@royalgreenland.com

Assit: Jakob Broberg

Asseq

 
 

Royal Greenland aperiguk

i
Write the text from the image