- Qaammatit marluk kingulliit ingerlanerini Kangaatsiap Uummannallu nunaqarfiini pikkorissaavugut. Pikkorissaanitsinni ilaatigut inuttut aammalu suliffeqarfimmi suleqatigiissinnaaneq pillugit pikkorissaavugut qulequtsersimasatsinnik "Ileqqunik inooriaatsimillu allannguineq". Nunaqarfinni Ikerasammi, Saattuni, Uummannami Nuugaatsiarmiut peqataaffigisaanni, Ikerasaarsummi Attumilu pikkorissaavugut, Royal Greenlandimi sulisoqarnermi immikkoortortaqarfimmi sulisoq Katrine Andersen oqarpoq.

Suleqataasut pikkorissarnerminni ilaatigut suliffeqarfimmi suleqatigiissinnaanermut tunngasut aammalu inuttut suliffeqarfimmilu ineriartornermut tunngasut sammivaat.

- Suliffeqarfinni ataasiakkaani suleqatigiinneq pitsaasup anguneqarnisssaa pikkorissaanerni siunertaavoq. Ileqqunik inooriaatsimillu allannguineq pillugu pikkorissartitsinitsinni qulequttat soorlu qinngasaaruttarneq, attaveqaqatigiinneq aammalu akerleriissuteqartarneq taamatuttaaq ileqqut suliffimmut sunniuteqarnerluttut qanoq allanngortinneqarsinnaanerinut tunngasut sammineqartarput, Katrine Andersen oqarpoq.

Pikkorissaqataasut pikkorissareernerminni naliliilutik immersuisarput taamatuttaaq suleqatigiikkuutaarlutik suleqatigiinnissamik isumaqatigiissusiortarlutik.

Qulequttat paquminartut

Pikkorissartut ataasiakkaarlutik misigisaat aallaavigalugit pikkorissarnermi qulequttat sammineqartut paquminarsinnaasut soorlu qinngasaarisarneq aammalu inuit ataasiakkaat ileqqorisaat sulifimmut sunniuteqarnerluttut sammineqartarneri pissutigalugu pikkorissarnerni ammasumik oqalussinnaaneq peqataasut ilaannut ajornakusoorsinnaasartoq Katrine Andersenip oqaatigaa.

- Qulequttat sammineqartartut ilaat paquminartuugaluartut taammattoq pikkorissaqataasut naliliinerminni pissarsiaqarsimanertik ersersittarpaat. Amerlasuut oqaliallassimallutik tatigineqartutut misigillutik aammalu tusarnaarneqarsimallutik misigisimanertik ersersittarpaat. Suliffimmi ataqqeqatigiinneq, ammasuuneq aammalu tatigeqatigiinneq suleqatigiillluarnermut pingaaruteqarluinnartuummata pikkorissaanerit inunnut ataasiakkaanut pitsaasumik angusaqarfiusarmata naammagisamaarlunga misigisarpunga, Katrine Andersen oqarpoq.

Ukiaanerani Maniitsumi Ilulissanilu aqutsisunik ineriartortitsinermi pikkorissaanerit tunisassiorfinni aqutsisut peqataaffigisaat aamma ingerlanneqarput. Pikkorissaanerit taakku marlunnik immikkoortortaqarput.

Pikkorissartitsinerit taaneqareersut saniatigut tunisassiorfinni akisussaaffeqarlutik sulisisut sillimaniarnemut tunngasunik, truckersinnaanermut, kranilerisinnaanermut, eqqiaanermullu tunngasut pillugit pikkorissartitsinerit peqataaffigaat.

Royal Greenland Academyp nunaqarfinni sulisunik pikkorissaaneq nangillugu ukiumi nutaami Upernavimmi nunaqarfiinilu pikkorissartitsiniarpoq.

Royal Greenlandimi sulisut inuit 510-it 2014-15-imi pikkorissartitsinerni Royal Greenland Academymiimit aaqqissuuneqartuni peqataapput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image