- Ukioq manna saattuat 543 tonsit maannamut tunisassiaraavut siorna piffissap taamaalinerani 744 tonsit tunisassiarinikuullugit. Saattuanik annikinnerusunik tunisassioraluarluta tunisassiorfimmi sulisut ikilinngilavut, kisiannili novemberip aallaaqqaataani saattuartassat 250 tonsinik ilaneqarmata sulisut 20-inik ilavavut, Paamiuni Royal Greenlandip tunisassiorfiani ingerlatsisoq Ilannguaq Abrahamsen oqarpoq.

Ukioq manna aqutsiveqarfimmi Paamiuni Nuummilu saattuartassat 950 tonsiusut septemberimi aalisaneqareerput. Novemberip aallaqqaataani saniatigut pisassat 250 tonsit aalisarneqarsinnaalerput. Saniatigut pisassat aalisarneqarsinnaalermata aalisariutit pingasut Paamiuni Royal Greenlandip tunisassiorfianut tunisisarput. Saattuarniartoqaqqilernera tunisassiorfimmi saarilliit nerpiinik tunisassioreersumi suliffissanik nutaanik pilersitsivoq.

- Septemberimi saattuartassat pisassiissutigineqartut aalisarneqareemata saattualerivimmi sulisut 20-it saarullinnik tunisassiorfimmut nuutinnikuusagut saattuanik tunisassiorneq qanittukkut aallarteqqimmat taakku saattualereqqilerput. Taamaattumik saarullinnik tunisassiorfimmi sulisut nutaat 20 –it qanitukkut sulilersippavut, Ilannguaq Abrahamsen oqarpoq.

Pisassat sipporlugit pisaraat

Ukioq manna saattuartassanik 950 tonsiuunik aalisarneq septemberimi unitsinneqarmat sippuilluni pisaqartoqarsimavoq. Taammattumik saniatigut pisassat 250 tonsiusut novemberip aallaqqaataani aalisarneqarsinnaalermata sipporlugu pisat ilanngaatigineqarput. Ilannguaq Abrahamsen isumaqarpoq ukioq manna siornamut naleqqiullugu saattuanik annikinnersunik Paamiut tunisasiorfianut tunisisoqarnera Palar Seafood Nuummi saattuanik tunisassiorfeqalernera ilaatigut pissutaasoq.

- Saattuat 50 -100 tonsit missaani suli tunisassiarisinnaallutigik naatsorsuutigaara. Ukioq manna pisassat siornarniit sukkanerusumik pisarineqarput. Ukioq manna saattuartassat pisarineqapallannerinut Polar Seafoodip Nuummi saattuanut tunisassiorfeqalernera pissutaasunut ilaasimasoraara, Ilannguaq Abrahamsen oqarpoq nangillunilu:

- Soorngunami maanna Nuummi saattuanik tunisassiorfeqalernera ukioq manna saattuanik tunisassiornitsinnut unammillernarsimavoq, ingammik aalisariutit uagutsinnut saattuanik tunisisartut tigummiinnarniarneri eqqarsaatigalugu. Taamaattumik aamma saattuat kilumut akii ukioq manna qaffassimavavut. Maannakkorpiaq aalajangersimasumik alisariutit pingasut uagutsinnut tunisisarput, Ilannguaq Abrahamsen oqarpoq.

Paamiuni tunisassiorfimmi inuit katillugit 70 –it missaanik amerlassuseqartut sulisorineqarput . Taakkunannag inuit 50-it saarullinnik tunisassiornermi paarlagaallutik sulisut sulisorineqarput, inuillu 20-it saattuanik tunisassiorlutik sulillutik.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image