Inuusuttut ilinniartut 26-t Royal Greenlandimi, Air Greenlanimi aamma Tele Postimi suliffimmik misiliillutik sulisut pikkorissarnermi peqataapput. Pikkorissartinneqartut amerlanerpaat imminnut ilisarisimanngillat, kajumissutsimilli sulinerup qanoq angusaqarfiusinnaanera pillugu pikkorissaqatigiipput.

- Kajumissutimik sulineq pillugu ilinniartut pimoorussinerulernissaat eqaannerusumillu suleqateqarsinnaaneq pitsanngorsarusupparput. Pikkorissartitsineq ikioqatigiilluni suliamik kivitseqatigiissinnaanissamik kajumissaarineruvoq, taama oqarpoq aaqqissuussinissamik isumassarseqataasoq RoyalGreenlandimi tuniniaanermi ingerlatsisoq Malik Hegelund Olsen.

Pissarsiaqarfiusoq

Pikkorissartitsinermi peqataasut assigiinngitsunik sammisaqartinneqarput suleqatigiisinneqarlutillu. Qulequttat assigiinngitsut sammisaralugit aamma 2016-imi suliassaasinnaasut pillugit allattuipput isummersoqartigiisinneqarlutillu. Kingorna suleqatigiikkuutaanut arlalinnut avinneqarput, samminneqartullu ilagaat eqqumiitsuliorneq kulturilu, meeqqat inuusuttullu, ilinniarneq aamma timersorneq.

Pikkorissaqataasut ilagaat Royal Greenlandimi innaallagisserisutut ilinniartoq Maria Nathansen.

- Aallaqaammut eqqarsarpunga pikkorissarneq Arctic Winter Games 2016-mut kajumissutsimik suleqataanissamut tunngassuteqartoq. Pikkorissarnerli ilimagisanniit siammasinnerujussuuvoq. Isumassarsiaq isumassarsialatsianngorsinnaavoq, suliniutillu timitalernissaanut kivitseqatigiilluarnikkut suleqatigiilluarnissaq pingaaruteqarluinnartoq paasivara. Suliniutit amerlasuut kivitseqatigiilluni anguneqarsinnaasut amerlaqisut paasivara, Maria Nathansen oqarpoq.

Iluatsilluartoq

Pikorissartitsinissamik isumassarsiaq Malik Hegelund Olsenip aamma pikkorissartitsinermi aaqqissueqataasup Mette Steenholdtip Air Greenlandimeersup septemberimi aallartippaat. Taakku marluullutik kajumissutsimik suleqataaneq pillugu suliffeqarfinnut pikkorissartitsinermi peqataapput. Taamani pikkorissartitsinermi Arctic Winter Games 2016, Kalaallit Nunaanni Timersoqatigiit Kattuffiat aamma Meeqqat Inuunerissut aaqqissuisuupput.

- Taamani pikkorissarnitsinni suliniummik piviusunngortitassatsinnik suliaqartussanngoratta, pikkorissarnerpullu pissarsiaqaatigilluaratsigu inuusuttut ilinniartut pikkorissartikkusullugit siunniupparput, Malik Hegelund Olsen oqarpoq nangillunilu:

- Inuusuttunik ilinniartunik pikkorissartitsineq nalilersussavarput, kisianni isumaqarpugut aaqqissuussarput iluatsilluartoq. Siunissami taamatut aaqqissuusseqqissanerluta suli naluarput, piumassuseqarpugulli.

Allattoq: Nathan Kreutzmann, nakr@royalgreenland.com

Assit: Malik Hegelund Olsen

Asseq

 
 

Royal Greenland aperiguk

i
Write the text from the image