- Ukioq manna saarullinnik tunisineq pitsaaneroqaaq. Saarulleqarnerulernera Qeqertarsuarmi aamma malunnarpoq. Saarulliit tulaanneqartartut angisujupput kusanarlutillu, Qeqertarsuarmi tunisassiorfimmi ingerlatsisoq Emil Mølgaard oqarpoq.

Saarulliit Qeqertarsuarmiuniit Kangerlummiuniillu tuninineqartut tamarmik blokkinngorlugit qerinasuartillugit suliareqqitassanngorlugit tunisassiarineqartarput. Saattuanilli tunisassiorneq appariangaatsiarpoq. Ukioq manna Qeqertarsuup tunuani saattuartassat 600 tonsiupput, maannamulli tunisassiorfimmut tunineqartut pisassiissutigineqartuniit ikinnerungaatsiarput.

- Siorna novemberi tikillugu saattuat 300 tonsingajaat tunisassiaraavut. Ukiorli manna maannamut 135 tonsiinnaat tunisassiarereerpavut. Ukioq manna saattuanik tunisisukinnerunera angallataatillit namminersortut angallataasa pisoqalisimanerannik aamma aalisartut angallataatimik aserfallatsaaliorniarnerata unamminartoqarsimaneranik peqquteqarpoq. Angallatit marluk atorsinnaajunnaarnikuupput, tamannalu saattuanik tunisassiornitsinnut malunniutaavoq. Pisassiissutit tamakkerlugit aalisarneqarnissaat naatsorsuutiginngilarput, Emil Mølgaard oqarpoq.

Sulisunut malunniuteqanngitsoq

Qeqertarsuarmi Royal Greenlandip tunisassiorfiani sulisut katillugit 27-upput. Tunisassiassalli annertussusaasa nikerarnerat tunisassiorfimmi sulisut sulinerannut malunniuteqanngilaq.

- Saattuanik tunisassiat affaannanngoraluartut tunisassiorfimmi sulisut suliassaqaannavittarput. Saarullinnik suliareqqitassanik tunisassiorneq tunisassiorfimmi suliassaqartitsiuarpoq, saattualerinerlu annikilligaangat sulisut saarullinnik tunisassiorfimmut nuuttarpavut, Emil Mølgaard oqarpoq.

Qeqertarsuarmi tunisassiorfik nipisat suaannik aamma qaleralinnik tunisassiorpoq. Nipisat suaannik tunisassiat novemberip aallartilarnerani 70 tonsiupput qaleraliillu 19 tonsit tunisassiarineqarlutik.

Allattoq: Nathan Kreutzmann, nakr@royalgreenland.com

Asseq: RG

Asseq

 
 

Royal Greenland aperiguk

i
Write the text from the image