- Qullukkiassatsinnnik augustusimi katersilluta aallartinnikuuvugut oktoberimilu qulluilluta aallartilluta. Maannamut qulloriikkat 7 tonsit nivingariaannanngorlugit piareeqqasuutigaavut taakkulu novemberip naalernerani panerserlugit nivingaassusalissavavut, Ukkusissani Royal Greenlandip tunisassiorfiani ingerlatsisoq Johanne Knudsen Samuelsen oqarpoq.

Royal Greenlandip Ukkusissani aammalu Nuugaatsiami tunisassiorfiini kisiartaallutik qullukkanik tunisassiorput. 2014-15-mi Ukkusissani qullukkat naammasseriikkat 2,8 tonsit misingi tunisassiarineqartut Nuugaatsiami 1,8 tons missingi tunisassiarineqartut.

Qalerallit qullukkiassat ukiaqqaarnerani katersorneqalertarput ukiarluarneranilu qullukkiareriarlugit issillualernerani panerserneqartarlutik. Qalerallit qullukkiarineqartut paneraangata qulerarterutaannaanik oqimaassuseqalertarput. Ukkusissani siorna qalerallit 22 tonsit qullukkiarineqartut panermata 2,8 tonsit tunisassiarineqarput.

Qullukkerineq pisariuvoq

Ukkusissani tunisassiorfimmi inuit nalinginnaasumik 14-init missingi sulisorineqartaraluartut maanna qullukkerineq aallartimmat sulisut 17-iupput.

- Ukkusissani imermik sipaartariaqarnerput pissutigalugu qalerallit qullukkiassat imermik kuerarlugit salittaraluakkavut maanna assaannarmik tattaajarneqartaramik ukioq manna qullukkerinerput pisariuvoq. Taamaattumik aamma sulisut amerlinikuuagut, Johanne Knudsen Samuelsen oqarpoq.

Issillualeriarpat qullukkiat quersuarmi angisuumi nivingaassorneqassapput, tassanilu qaammatini arlaqartuni panerserneqareerpata karsersuarnut ninngusuunut issoraallugit Nuummut nassiunneqassapput tassanilu nunatsinni tunissassiatut poortorneqassallutik.

Nuugaatsiami qullukkerineq aamma aallartinneqangajalerpoq. Royal Greenlandimi Nunatsinni tuniniaaviup pisortaata Malik Hegelund Olsenip naatsorsuutigaa ukioru qullukkat tonsit sisamat missingi tunisassiarisinneqarumaartut.

Allattoq: Inga Egede, ineg@royalgreenland.com

Assiliisoq: Johanne Knudsen Samuelsen

Asseq

 
 

Royal Greenland aperiguk

i
Write the text from the image