- Erngup aqqutaani ruujori qerisimammat ajoraluartumik ullumi aqagulu tunisisoqarsinnaanngilaq. Erngup aqqutaa qerisoortoq Nukissiorfinniit aaqqinniarneqarpoq, taamaattumik neriuppugut pingasunngorpat tunisisoqaqqissinnaalissasoq, taama oqarpoq Atammimmi Royal Greenlandip tunisassiorfiani ingerlatsisoq Erik Henriksen.

Tallimanngormat tunisassiorfimmut tunineqartut tunisassiarineqarmata tunisassiorfimmi sulisut ullumikkut aqagulu sulissapput.

- Tallimanngormat tunisat igiinnarusunnagit ullumikkut poortorpagut qeritillugillu. Tunisat pingasunngorpat aatsaat poortussagaluarutsigit pisoqaliisussaapput iginnaartariaqalissallutillu. Taamaattumik sulisuvut ullumikkut aammalu aqagu sulissapput, Erik Henriksen oqarpoq.

Aalisartut 30-it missingi ullumi aqagulu Atammimmi tunisassiorfimmut tunisisinnaanngillat.

Aaqqinniarneqarpoq

Taamatuttaaq Attumi Royal Greenlandip tunisassiorfianut tunisineq ullumikkut unitsinneqarallarpoq.

- Ullaaq suliartoratta tunisassiorfimmi erngup aqqutaa ruujori qaarsimasoq paasivarput. Taamaattumik sulisut pingasut angerlartiinnartariaqarsimavavut allalli tallimat ruujori qaarsimasoq aaqqinniarsaralugu sulipput, Attumi Royal Greenlandip tuniassiorfiani ingerlatsisup tullersortaa Imiina Hammond oqarpoq, nangillunilu ima oqarpoq:

- Saarulliit karsit 40-it ullaaq tunineqartut tunisassiarisinnaangikallarpavut aatsaalli ruujori aserortoq aaqqippat tunisassiarisinnaasaallutigik. Taamaattumik aamma erngup aqqutaa aaqqitsinnagu aalisartut tunisisartut 17-iusut tunisisinnaanngillat. Kisiannili neriuutigaarput ullumikkut erngup aqqutaa aaqqissinnaassallutigu, Imiina Hammond oqarpoq.

Attumili tunisassiorfimmi sulisut allamik aamma ajornartorsiuteqarput.

- Traktori tunisat assartornerini atorneqartartoq aserornikuuvoq, taartissaatali tikissiisaa Pilersuisup biilii assartuinitsinni attartortarpavut. Ajoraluartumillu taakku biilit aamma issinnera pissutigalugu ullaaq manna allartissinnaasimanngimmata tunisineq aallarteqqippat tunisat nammineq assartoriaqassavavut, Imiina Hammond oqarpoq.

Allattoq: Inga Egede, ineg@royalgreenland.com

Assit: Nathan Kreutzmann aaammalu Imiina Hammond

Asseq

 
 

Royal Greenland aperiguk

i
Write the text from the image